陳法拉幸得男友疼錫渡難關
陳法拉一劇接一劇，之前拍《東西宮略》時壓力大致情緒及身體都受到影響，之後休息了一段時間才得以好轉，除了得到同劇演員關懷、體諒外，幸得男友在身邊默默支持和給意見。
上年陳法拉拍劇集《東西宮略》時，身體不適、面部出現麻痹，其後放了一個長假期休息，病情得以好轉。日前法拉接受訪問時憶述劇中有些場口要一人分飾三角，性格不同，加上鍾無艷一角每次化妝都需時最少兩個鐘，整個人又攰又大壓力，如精神分裂般。
做喜劇OK
法拉承認當時壓力爆煲：「成個人好唔舒服，精神崩潰，期間請咗幾次假去睇醫生，不過同劇啲演員都好好，好照顧我，佢哋知我情緒唔得，叫我休息又同我做心理輔導、傾偈，本來之後我要接拍《名媛望族》，但真係拍唔到，結果放咗兩個月大假，返咗美國，畀自己放鬆一下。」男友薛世恒都有過美國陪她一段時間，薛生有否叫她不做？法拉說：「冇，佢從來冇叫過，佢好支持我，反而成日會同我傾偈，問我點諗，仲讚我做喜劇都OK，喺事業上佢畀好多意見我。」
等機會北上
法拉正為個人處女大碟錄音，歌曲不是純粹講愛情，亦有講及生活及心聲，首次出碟她毫無壓力，因銷量並非她能控制。潮流興北上拍大陸劇，法拉不曾有機會賺人仔，她說其實好多製作商找她，只是要小心選擇，靜候到大陸拍處女劇的機會，她說：「喺無綫拍劇都好好，又同我接好多外地工作，淨係登台、剪綵都接到手軟。」5月，法拉將接拍新劇《衝上雲霄2》。文：影視組
攝影：唐豁莊
化妝：ANNIE G. CHAN
髮型：Garius Chan