楊千嬅：男性朋友較啱傾

友情在這個圈很現實，你當人是好朋友，但別人未必當你是朋友，以前細個遇到這種事會好傷心，但經歷過這麼多之後，你就會明白。如果我決定你是我一世朋友，而你呃我，我就當「豪」畀你不會計較，但如果你不是我朋友，會直截了當不睬你。

梁漢文性格好

在圈中我同男性朋友比較傾得埋，跟Eason、Edmond算是老友，雖然大家不是成日見面，但一碰面就乜都傾，同Edmond熟並不是因為識得耐，而是我好了解Edmond，他性格好，待朋友更好，而同Eason識於微時，大家的底牌早就見晒，佢兩個都是真心傾到偈的朋友，大家不需要講太多都會明，那種信任是好難得，並非人人做得到。

除了Eason、Edmond，我同阿田（側田）、Daniel（吳彥祖）、古天樂、BoBo（陳文媛）都傾到偈，其他女仔朋友都是圈外人，可能女仔跟女仔始終會「度」，即使我不介意，別人又是否真心信我呢？我個人慢熱，但認定你是一世的朋友，無論你做錯與否，我都會盲目支持，我會好記得扶持我那班人，所以對幕後製作那班人有份情意結，好處是有班信賴的音樂人及朋友，但壞處是好難接受新夥伴。

不令自己降格

同我老公初相識未真正拍拖時，我有問佢聽到楊千嬅係個咩人？佢話聽到人話我好犀利、唔會死錯人，其實只是我好好運，個天畀到運氣我行這條路，當然我不是蠢人，但未叻到做事好有野心，因為我覺得自己好優雅，自尊心好強，不可以鬆人踭，不會做一些令自己降格的行為。（完）

後記：

跟千嬅相約做呢個連載訪問，事前擔心佗住巨肚的她出來會好辛苦，本打算跟她電話訪問，怎知千嬅主動約記者出來面對面暢談。在兩個小時裏我們天南地北乜都傾，看着千嬅出道，建立事業，到拍拖、分手再結婚，快將做媽媽的她，這個幸福小女子依然傻氣十足，但卻多了份恬靜美。

口述：楊千嬅　筆錄：音樂組