Lynn偕父母甜爆見城城
熊黛林早前與郭富城鬧情變降呢做朋友，有傳是Lynn逼婚不遂，結果惹來反效果，要在微博向城城「耍冧」，昨日城城除了開口護Lynn外，更表示婚一定會結，而連日來愁爆的Lynn，晚上趕往整頭，並帶同父母到城城飯堂見家長。
郭富城與熊黛林雖已被外間認定一對，但城城從不肯公開承認，有指Lynn有感已到適婚年齡，故近日出席活動時頻頻高調談論戀情，早前更暗示情人節收到城城送贈的吊墜，務要逼男友步入教堂，不過卻觸怒向來感情事低調的城城，他更即時否認送過吊墜，惹來分手傳聞。Lynn眼見男友發怒立即封嘴，並努力箍煲。
不否認送吊墜
昨日城城出席浪琴錶活動，被追問二人是否已分手？他即說：「最近有好多關於我同Lynn嘅報道，某啲報道上佢都幾委屈吓，希望大家畀多啲空間我哋正常發展。（係咪分手？）已經講晒，其他唔講喇，（你哋依家正常發展緊？）係，我唔想將我嘅感情世界高調處理。」被問到是否之前送吊墜一事發生有摩擦？城城表示不欲多談。
城城表示Lynn受到委屈，問他是哪方面的委屈？他說：「唔使講咁多，（點樣補償？）所以就話畀啲空間我，（點解佢嗰日話以後唔講你？）有啲報道令佢委屈，（你否認送吊墜畀佢嘅報道？）唔係！」
罕有開腔撐女友，豈不雨過天青？城城表示現階段工作為先，感情事順其自然，他說：「我知大家好關心我，我都唔係小朋友，我可以做就係維護我身邊嘅異性朋友，同埋希望大家畀多啲空間我，等我可以喺良好嘅環境下處理我嘅感情生活，總之結婚我會公開，我都想大家祝福我，我係傳統男人，我一定會成家立室，但要畀啲時間我！」不過當問到Lynn是否其結婚對象時？他想了想回答說：「唔知。」他又強調近日有很多報道對Lynn造成委屈，作為「朋友」的他認為要站出來保護對方。
「屈尾十」出動
另邊廂，昨日下午五時，Lynn到中環整頭，約兩小時後離開，再被追問獲城城力撐，她說：「仲未睇到報道唔回應。」而城城表示結婚會公開，Lynn呆一呆後沒有作答，繼而表示返屋企食飯。
不過Lynn回家逗留十分鐘後又出動，駕車與父母到城城常光顧、有富豪飯堂之稱的富聲海鮮酒家開飯，被問到是否約了城城？她春風滿臉沒有否認，還不時向記者甜笑，相比日前被本報拍得愁爆樣子，可謂天淵之別。
採訪：名人組、追蹤組