黃又南人生谷底當磨練
黃又南近來財政狀況改善，除連接多部內地電影及電視劇外，更一度榮登內地網上人氣搜尋榜之列。他不諱言心痛父親被抨擊，另又樂觀地視人生谷底為磨練。
阿南早前在內地宣傳主演新片，想不到意外暈倒成全場焦點，當被背往後台休息之際，大批記者一擁而上，令緊接上台獻唱主題曲的歌手遭冷落，阿南說起來仍不好意思的說︰「真係要講聲唔好意思，我當日嘅工作係宣傳，嗰次好似失職咁。其實我健康一向唔錯，絕對唔係藥煲，嗰日都係因為燈光太強，自己又着晒厚衫，一時散唔到熱。後來我再會合大隊趕場，見到打燈嘅台都驚，好似患咗舞台恐懼症咁。」
冇嬲過父親
近期在內地市場吃得開，阿南與家人的債項已清得七七八八，父親正式結束了印刷生意，積極投入上班行列，而他的暈倒被大做文章，爸爸再次被拖落水，令阿南大感心痛。雖然這幾年來節衣縮食，但他不諱言覺得是種鍛煉︰「04-09年係捱得好辛苦，但正面啲睇我唔覺得自己係最慘嘅一個。成件事坦白講，我冇嬲過自己爸爸，佢一直表現得好正面，反而有時我控制唔到，喺佢面前發脾氣。」如今一家人住在一起，親情更勝一切﹗
唔為錢拍戲
阿南內地工作不斷，早前與楊冪等合拍的《孤島驚魂》更打破了國產恐怖片的票房紀碌，問到他如今片酬是否三級跳？阿南笑說﹕「呢個真係唔知，交畀經理人Amy負責。當然生活係需要錢，但我唔想淨係因為錢去拍戲，咁會多咗麻煩。多謝Amy一直支持，我從佢口中知道（債務）差唔多搞妥。」
文﹕影視組