宋熙年泰識歎 濕住睇星星

無綫藝員宋熙年早前與友人到泰國蘇梅島度假，順道為待嫁好姊妹舉行婚前單身派對。問到有否艷遇？熙年說：「艷遇就冇，不過就遇到個泰國好導遊。佢見我哋四個女仔，就帶我哋出海潛水後，又介紹我哋去食當地海鮮、榴槤、地道食物。」

蘇梅島最有名的是full moon party，問熙年有否去見識？她說：「冇呀，今次時間撞唔啱，同埋我唔飲酒，呢啲Party都唔係好啱我。因為好耐冇成班女仔去旅行，今次大部分時間都係留喺屋裏面傾偈。」

搵錢不忘進修

熙年此旅程相當悠閒，晚上於二千多呎的獨立度假屋內天台泳池，邊喝香檳邊浸水睇星星，相當寫意。她說：「返到嚟香港仲浪漫，其中一個姊妹嘅男朋友喺機場求婚，自己都感動到喊。」熙年指四位好姊妹中有一半已名花有主，但她不心急，現時以事業為先，感情隨緣。

熙年近期除忙於主持節目《東張西望》，亦經常任活動司儀搵真銀。雖然忙碌，但她不忘充實自己，計劃讀營養學進修。她說：「因為自己鍾意食，所以想了解食物營養。呢啲學咗終身受用，其實上年想讀，但啱啱有新節目度唔到期。」

文：影視組