胡定欣責馬國明博宣傳
馬國明和胡定欣這對緋聞情侶一直未公開承認關係，但他為肉痛女友被「唱」公主病和貪錢識富豪而慘被他「飛」，不惜自爆二人「過去式」的戀情以作澄清，惟定欣昨被追問舊情時卻笑言嬲爆馬國明借她宣傳。
一向內斂的馬國明向來少提感情事，但今次自爆與胡定欣早於2010年演出節目《舞動奇跡》時「撻着」，但戀情維持了一年便分手，馬國明昨日接受電話訪問時坦承二人因性格不合而分手收場：「我哋性格上唔係好夾，（佢太進取？）其實我係一個隨遇而安嘅人，可能timing唔啱，所以好和平就分咗手，依家我哋都keep住係好朋友，我今次講係想澄清定欣唔係公主病，唔係咩我飛佢，佢係好好嘅女仔，我哋都有約食飯，你哋影到都唔出奇，因為我哋都仲係緋聞情侶，哈哈！（復合？）將來嘅嘢唔知！（為女澄清卻被指博宣傳而嬲你喎？）下次咪唔講囉！」
見面唔尷尬
昨日這對「過氣」情侶在電視城的化妝間前後腳出現，定欣被追問這段舊情時，她笑說：「佢自己講就問番佢啦！（見面尷尬？）唔會，都係朋友，（拍咗一年？）你哋問得我太突然，私人嘢私下處理啦，我係要到結婚嗰刻先會公開嘅人，（馬國明忍咗好耐先講？）哈哈……我懷疑佢借我嚟做宣傳，佢套《On Call 36 小時》收視好好啦！（嬲？）嬲架！借我做宣傳！」
文：影視組