黎耀祥續約表效忠
王維基的「電視王國」今日總動員動土，無綫面對內憂外患，各高層分頭向藝人傾談續約事宜，當中有耍「人情牌」，亦有出動銀彈攻勢，據知效忠無綫多年的黎耀祥、黃智賢和湯盈盈等已動筆與無綫續約數年！
王維基成功於無綫挖走不少台前幕後工作人員，今日更總動員出席將軍澳電視製作中心動土儀式，據知之前大彈無綫「Totally Very Bad」的黃日華更會與老闆王維基齊齊舞獅助陣，甚具聲勢！無綫眼見形勢緊迫，各高層如樂易玲、曾勵珍、六叔愛將陳輝光等連日來都漁翁撒網式向藝員提早傾合約，據知很多未滿約的藝人竟即時「吊高嚟賣」，更大玩「拖字訣」，幸亦有一班實力派演員繼續效忠無綫，包括黎耀祥、黃智賢、湯盈盈等。
「價錢我都好滿意」
記者昨致電祥仔，他直認剛動筆跟無綫續了藝員合約，今次更是由向來知能善任、愛錫祥仔的曾勵珍親自跟他傾約，他說：「我哋都係傾人工、年期，價錢我都好滿意，（出面嘅條件打動唔到你？）我呢半年喺無綫嘅工作已經排到好密，起碼做到八月，半年後嘅嘢都未落實，我都唔可以應承人哋啲乜，況且我唔會放棄香港巿場，我都試過大陸拍劇，每日放工就對住幅牆，我又有家庭，唔係好啱我。」
去年台慶奪得「男配角」的黃智賢亦續了約，並轉了簽包薪經理人合約，他表示珍姐及樂小姐都分別見過他，薪酬亦比之前多：「自己同無綫合作多年，公司嘅誠意十足，既然條件唔錯，都想繼續合作落去。」他坦言現時於新劇《雷霆掃毒》中的角色戲份增加，絕對有發揮機會。
至於第一份工便於無綫的湯盈盈亦不諱言續了包薪合約：「我都唔捨得離開，喺度個個都熟，有歸屬感，（喺度等嫁？）依家續咗約，梗係勤力啲做嘢啦！」
此外，無綫外事部副總監曾醒明回應指會安排慣常活動，不需要對撼王維基的動土儀式，只以平常心待之。
文：影視組
圖：資料圖片