GaGa港騷掀全城撲飛熱 王賢誌晒命 Jeana Call白車

Lady GaGa將於5月2日假亞洲博覽館開演唱會，因為只此一場，再加上GaGa處女空降香港開騷，真的一票難求。AE卡用戶昨日至明天（23日至25日）可優先在網上、電話及通利琴行買飛，27日才公開發售，票價最高為$1,580，最低$480，手續費另加$10，但若內部訂購手續費則高達$205。

劇痛難當 痛苦呻吟

身為GaGa死硬fans的Jeana早已講過要撲飛，即使前晚返內地打碟開通頂，昨日仍打算晨早排隊買飛。未知是否操勞過度，加上食無定時，Jeana臨出門一刻突然又屙又嘔，狂標冷汗，與她同屋的o靚模韋彤即帶她落樓下診所求醫。可惜診所人流如鯽，韋彤見求醫無門，立即Call白車。

放大圖片	La Ying緊張到場，很擔心緋聞女友Jeana病情。	Jeana（左）在師妹韋彤攙扶下離開醫院。

Jeana之後被送往廣華醫院，一度要靠氧氣罩幫助呼吸，緋聞男友La Ying得悉Jeana入廠，即飛車趕往醫院，只見臥床的Jeana等候醫治時痛苦難當，原本擁有5呎7吋身高的她痛到縮剩3呎，不時發出呻吟聲，La Ying見狀即撫摸Jeana髮鬢。經醫生診斷後確定Jeana患上急性胃炎。記者及後致電Jeana，她表示已返回家中休息。她說：「因為我成日捱夜，加上成日食辣嘢，搞到個胃壞咗！我都知衰，好彩唔使留院！醫生叫我要戒口同休息，都冇辦法，惟有休息幾日。」問撲不到GaGa飛會否失望？她說：「都冇辦法，身體緊要，香港睇唔到，La Ying話同我去日本睇，唔緊要。」

尖沙咀 尖沙咀通利琴行人龍亦打晒蛇餅。

灣仔 灣仔通利琴行昨日門外大排長龍。

一扇排開 何其壯觀

Jeana為GaGa搞到胃幾乎穿窿，但仍冇飛在手，可是有飛在手的藝人卻印印腳晒幸福。王賢誌更在微博晒40張GaGa飛，一扇排開，何其壯觀！他接受電話訪問時表示與朋友夾份買40張飛，上載相片只是與大眾分享喜悅，否認晒命。獲六張飛的李彩華承認是經內部認購，認為一票難求，多多錢都不賣。莊思敏緋聞男友林忠豪亦表示已有三十張飛在手，但嫌仍未夠喉。Angelababy經理人Kim則表示買到兩張飛，屆時會帶同女兒入場。另外，有傳何鴻燊家族獲分三百張飛，已有十張落袋的超盈否認是家人畀飛。

文：專案組