周秀娜嬲爆 男友出晶救火
周秀娜在剛過去的情人節被男友陳偉成（Avis）激死，差點令甜蜜之旅泡湯，笑指唔分手都算偷笑！Avis自知大懵闖禍，即以DIY的水晶手機殼冧掂女友！
娜姐、張智霖（Chi Lam）、溫碧霞（Irene）、劉心悠、黃柏高等前晚出席公司春茗，稍露事業線的娜姐成為焦點所在，不過胸前過敏紅了一片，可謂美中不足。不怕「冷親」？娜姐即說：「我依家滿肚火，要降溫就真！」
原來剛過去的情人節，娜姐計劃與男友Avis到泰國過二人世界，豈料抵機場check in時，才發現Avis的護照過期，結果當場打道回府，甚為冇癮。娜姐幽默的說：「消防員冇到場幫手（救火），佢就即刻攞咗個黐咗三晚水晶嘅手機殼出嚟賠罪，之後我同佢去排快證，結果四日後成功申請番本護照，再飛曼谷拜神囉，但玩得唔夠。（有相士話你哋適合去當地結婚喎。）唔分手都偷笑啦，仲結婚？」
張智霖偷食
至於Chi Lam為月底開拍的新戲積極減磅，下月又要為《一代宗師》補戲，保守估計要減廿磅，不過前午他與太太袁詠儀興起，半小時內連走兩間拉麵館「偷食」：「食完咪後悔囉，所以逼自己行大段路去搭港鐵當減肥。」回復弗爆身形他信心十足，更說早前張家輝減肥，也曾致電他討教心得。
而Irene稍後將於新片內扮演大家姐，加上唱片及電視劇合約，今年會忙爆，雖然少了時間陪囝囝，Irene笑謂：「我想佢獨立啲，平時唔多見，一見到咪黐多啲我囉！」
文：影視組