周秀娜心噏：唔敢照腳
受傷在所難免，但肯定沒有人想跟「疤痕」做朋友，周秀娜去年因意外令最有自信的美腿受傷感染細菌，留下凹凸不平的疤痕，令她極度低落，連照鏡也只敢照樣，不敢照她的美腿。
上年隻腳喺馬來西亞拍戲時畀電單車的排氣喉辣親，初頭我覺得應該好小事，只係喺當地睇咗醫生，無乜點理。差唔多一個月我發覺傷口面積大咗、腫咗同比之前痛，嗰時我開始擔心同驚，但要工作惟有頂住。
自己有試過洗傷口，但擔心洗完唔會靚，亦試過做嘢時遮住個傷口唔畀人見到，但令皮膚周圍都發炎。嗰時開始好唔開心，加上一個人喺當地拍戲，覺得好孤獨，會亂諗嘢，而當時拍嘅戲題材圍繞唔開心嘅嘢，結果一場喊戲我就大爆發，喊到導演叫cut都繼續喊，嚇親劇組人員。
後悔冇覆診
結果我返香港即刻去睇醫生，先知情況好嚴重，個傷口有膿仲有霉菌，而我見到個傷口埋得唔平，心情低落到極點，嗰時要食抗生素，成個人都好忟，真係食唔落嘢，而且我好後悔，我應該整親之後要求劇組畀我睇多幾次醫生，等傷口埋得好啲。
求整淡疤痕
依家我一路都不能忘記自己整親嗰時嘅畫面，諗番起電單車我都會驚，亦好介意自己嘅疤痕，出去做嘢擺甫士都唔自然啦，唔希望畀人望到，慶幸客戶唔介意。但個心好唔舒服，因為我最滿意自己對腳同嘴，依家隻腳搞成咁，真係好困擾，所以依家唔敢照全身鏡，怕望到隻腳更加唔開心，屋企人見到我咁當然心痛，成日驚我會亂諗。
其實我有搵唔同嘅整容醫生，雖然唔可以百分百洗走個疤痕，但都想睇吓可唔可以整淡啲。呢件事係我上年最唔開心嘅事，明白到身體健康真係好重要，雖然今次個傷勢比其他人嚟講未算最嚴重，但我之後放假都會去泰國還神，希望今年各方面都順利。
口述︰周秀娜 筆錄︰專案組