朱茵爆Paul敏感出軌咪諗
今日情人節，拍拖多年的朱茵表示男友黃貫中已送了單車作禮物，但不打算生BB贈興。她更笑稱與男友一樣敏感，與異性出街時會避忌，怕未出軌前已釀成血案。
朱茵早前被指懷孕，昨日穿連身裙出席護膚品慈善活動時明顯圓潤，腰肢粗了少許，但她仍否認大肚。問到會否打算生BB當情人節禮物？她反應甚大說：「傻咗咩！人命關天！（係咪有咗？）絕對冇！（未講得？）真係冇！每年冬天着羽絨就會畀人咁寫，我要婚後先生BB，但未有計劃。」
已收單車禮物
問如何慶祝情人節？朱茵表示與黃貫中（Paul）已拍拖多年，未有特別計劃，可能留家煮飯仔，並指Paul已送單車作禮物，可以一齊做運動。對於好友梁小冰傳婚變，當日任伴娘的朱茵力撐好友：「我對佢兩公婆有信心，相信係誤會，結咗婚都可以有朋友嘛！（你同異性出街係咪好避忌？）不嬲都係，我同Paul都好敏感，佔有慾好強，驚未講就有血案，而且識得Paul嘅人都唔會對我有非分之想。」另外，提到教友羅慧娟近況，朱茵則不想回應。
美詩唔做主動
另外，同樣有穩定另一半的周家蔚與陳美詩，昨日到銅鑼灣出席情人節活動。下月21日嫁給洪天明的家蔚已戴上婚戒，即被取笑恨嫁。她笑言做足準備生B，最近食得健康，連頭痛藥都不敢服用。美詩則指男友孫耀威在北京開工，未必能共度情人節，更呷醋說：「佢有打電話備案，話每日都同唔同嘅女角拍咀戲，都唔知咩劇本嚟！」問到會否今年結婚？美詩笑言應由男方做主動。
文：影視組