杏兒先撐後罰索80萬名車

應屆視帝鄭嘉穎與視后胡杏兒前晚齊齊為全新BMW 3系新車揭幕儀式及派對擔任嘉賓，並主持新車揭幕儀式，兩人均大讚價值767,000元新車外形吸引。同場嘉賓包括模特兒Jocelyn與夫婿Anthony、Alice B.、甄子丹太太汪詩詩與妹妹汪圓圓等，眾人亦對新車大感興趣。

提到早前男友黃宗澤（Bosco）被拍到爛醉兼畀女圍一事，杏兒說：「我知情，佢唔係趁我唔喺度先去玩，我畀佢好大自由度，嗰啲係馬拉嚟嘅生意朋友，普通傾吓偈社交吓好正常，佢鍾意做咩就做咩，冇所謂。（扭佢耳仔？）係啦，罰佢買呢架車畀我，講笑咋！畀女圍好普通，做我哋呢行梗係要受歡迎，無論男仔同女仔都係。」身旁的鄭嘉穎即讚她說：「搵女朋友呢啲好，夠大方。」

汪詩詩（右）與汪圓圓孖住出席。	Jocelyn與夫婿Anthony出雙入對，十分恩愛。	Alice B.對現場展出的經典汽車款式大感興趣。

杏兒謂飲得（酒）多傷身，會勸Bosco別飲太多，她說：「其實Bosco都覺得自己瘀，畀人影到。」她又透露男友已買了情人節禮物給她。

嘉穎零感情生活

另外，有傳鄭嘉穎日前在橫店拍劇時，獲前緋聞女友佘詩曼上房陪他，對此他說：「呢啲報道都好信？寫到冇嘢好寫，下次寫我結埋婚生埋仔，我都唔知個故事點發展落去，自己都follow唔切，費事理。（你同阿佘係咪愛火重燃？）都話冇，我感情生活暫時係零，報道所講嘅嘢唔係事實。」

文：名人組