陳法拉去飲當公事：睇安排
眾星昨晚齊齊現身星煥國際春茗，一直被譽為「老闆娘」的陳法拉性感現身，提到「宿敵」諸葛紫岐將豪嫁薛家，身為「未來大嫂」的法拉封嘴拒絕回應，免增事端。
星煥全公司總動員包括法拉、鍾嘉欣、鄭欣宜、許廷鏗及剛由新加坡宣傳返港的江若琳（Elanne）傾巢而出，席上特別舉行儀式迎「巨聲幫」的胡鴻鈞加盟，無綫高層樂易玲及蔡一智夫婦亦有到場支持，而許廷鏗更即席獲頒金唱片。
想出埠拍靚封套
將殺入樂壇的法拉透露已錄製兩首歌曲，問到有否讓男友薛世恒優先試聽？她說：「冇畀人聽過，係商業秘密，（有特權出埠拍封套？）邊有㗎，每個女仔都想個封套拍得靚，都希望出埠㗎。」早前法拉回應薛嘉麟未婚妻諸葛紫岐小產時被指抽水，提到對方將於3月豪嫁，法拉即封嘴拒多作評論，至於會否出席？她說：「睇經理人同公司安排，（收到帖未？）人哋嘅嘢唔講喇。（諗咗送咩？）夠喇，唔好講，遲啲先。」
江若琳重提黑事
剛落機的Elanne就話不擔心與法拉同期出碟而資源被削，提到早前於內地被無良司機棄於高速公路，她說：「過咗去算喇，唔打算追究，真係黑到爆，之前拍戲又整親，不過應該黑完喇。」至於單拖出現的C君被問到隊友陸永缺席，他竟放「流料」，表示對方太太突然作動需即時入院，而陸永就透過電話否認，太太只是作檢查。此外，欣宜男友因腳傷於馬拉松賽事中三甲不入，她表示將於明年接棒參賽，又透露已為自己睇中四位數的眼鏡作情人節禮物，屆時會向男友「索取」。
文：音樂組