任賢齊割盲腸 五月天護駕
患上盲腸炎的台灣歌手任賢齊（小齊）昨日入院開刀做手術，新年流流認真大吉利是，最大鑊是他於月中就要在紅館舉行個唱，幸而小齊獲表演嘉賓五月天「護駕」，到時讓觀眾點唱，不用小齊太操勞。
證實患上慢性盲腸炎的小齊，忙於為本月18日在紅館舉行的兩場演唱會排練，由於一切準備就緒不能取消，一直不想開刀的他，希望捱得過演唱會後才動手術，惜右腹劇痛難當，即使打止痛針及服藥，作用都不大。
痛到面青青
昨晨10時戴着冷帽的小齊由女友Tina陪同現身養和醫院覆診，可能腹部陣痛，見他面色有點蒼白，問他病情如何？他用手按住腹部皺眉頭說：「OK嘅，（尋晚瞓到嗎？）OK啦，其實都唔係太嚴重，今日返嚟覆診，希望唔使做手術啦！」可惜事與願違，中午時分小齊經理人小柯特別下樓向記者透露，經醫生檢查後決定傍晚為小齊進行割盲腸手術。
唱片公司在晚上7時向傳媒透露：「小齊已完成微創割盲腸手術，好成功，放心。」據知他只需留院24小時，今日便會出院回家休息，由於距離開騷得番12日，心急如焚的小齊記掛住個唱排練，但醫生建議他出院最少休息3天，方可繼續工作，並叮囑他不宜作任何劇烈運動。
因禍得「福」
小齊今次演唱會獲一班好兄弟擔任嘉賓，包括台灣天團五月天、黃品源、陳昇等，他們得知小齊要做手術，五月天即表示「賣大包」，到時任觀眾隨意點唱！黃品源則表示小齊站在台中央便行，由他們嘉賓由頭唱到尾。陳昇更搞笑說：「你不要太辛苦，在台上伴舞便可，辣身一點！」小齊感謝一班好兄弟及粉絲對他關心，他定會盡力去唱：「大家請放心，醫生話手術後好快就可以好，呢2、3日我會閉關，斟茶遞水都唔會自己嚟，當享福啦，不過最麻煩係唔可以用花灑沖涼，惟有抹身。」
文：音樂組