黃宗澤爛醉畀女擒
黃宗澤（Bosco）與胡杏兒感情穩定，但性格貪玩的Bosco不時外出夜蒲，大前晚他又趁女友於內地拍劇，乘機往中環夜店狂歡，期間引來不少性感女郎猴擒搭訕，飲至凌晨四時的他還不勝酒力爛醉如泥，神情呆滯要數名友人合力抬上車。
黃宗澤與胡杏兒相戀七年，雖然感情生活甜蜜，二人更視對方為結婚對象，但仍未定性的Bosco曾惹來不少緋聞，杏兒亦設法箍實男友，做其跟得女友之餘，近年還索性搬往男方寓所樓上，全天候實性格貪玩的男友。
被讚靚仔要求合照
杏兒近月長駐內地趕拍新劇，Bosco未能與女友共度元宵佳節，大前晚又乘機作反曳曳，相約了數名友人前往中環蘭桂坊一間夜店狂歡。Bosco當晚悉心打扮，戴上賊仔帽，甫入夜店已極為注目，他先於貴賓區內作樂，但艷福不淺的他往洗手間時，即引來不少艷女埋身，大讚他靚仔又要求合照。
Bosco身旁男友人雖然曾為他擋駕，但最終有一名手持酒杯，穿上性感背心的惹火女郎突圍成功，飛撲上前與Bosco「近距離接觸」，二人有傾有講，Bosco更講到興高采烈笑騎騎，期間二人還愈傾愈埋頻頻咬耳仔。
未幾又有一名長髮女加入，為免再被女圍的Bosco亦甚有分寸，見他與兩女「短聚」後便與友人匆匆返回貴賓區耍樂。
現場所見，Bosco與友人頻頻舉杯暢飲，情緒高漲，更多次指手畫腳及大聲狂笑，飲了約個多小時已見Bosco不勝酒力，與另一醉酒男友人齊齊毫無反應，頭耷耷坐於一旁，其後友人上前為Bosco遞上熱茶，但他已爛醉如泥，神情呆滯，友人見狀惟有扶他起身。
「軟皮蛇」四人護駕
Bosco被兩名友人左右夾攻扶着，已像「軟皮蛇」全身乏力任由拖行離場，步出夜店後，他更要三，四名友人護駕，直至抬他上車，並由友人代為駕駛其座駕，送他返歸。
事後聯絡上Bosco，提到於場內被女包圍，他說：「因為我有啲馬來西亞朋友嚟咗，咪一齊出去玩囉。其實我好耐冇出去玩㗎喇。」當被指醉到要人抬走時，他尷尬笑言：「哈哈……我的確係畀人灌醉，不過咁多朋友在場都唔驚，（怕唔怕杏兒嬲？）唔驚，杏兒都識我啲朋友嘅。」
文、攝：追蹤組