徐淑敏沈卓盈續前生緣做好姊妹

Ｓ：徐淑敏　沈：沈卓盈

沈卓盈大讚徐淑敏優點多到數唔晒。	徐淑敏自爆曾經被沈卓盈彈衣着差而嬲對方。	徐淑敏表示兩人都是左邊臉靚啲。

共通點多食嘢最夾

Ｓ：仲記唔記得我哋點識架？

沈：記得啦，拍節目《最緊要正字》識嘅，當時我只係知你啱啱選完港姐，唔熟，喺化妝間見到你嗰陣，你個樣好cool，但我都過去同你打招呼，先發覺你原來幾Nice。

S：講真，五、六年前嘅嘢，我就唔記得，只係記得你話我唔笑個樣好惡。

沈：我哋第一日合作已經好投契，好記得同你一齊搭車，你問咗我好多娛樂圈嘅嘢，我講嘅嘢對你嚟講都好新鮮，你又好細心咁去聽，當時我覺得你好得意、好天真。

Ｓ：識咗咁多年，我哋都有好多共通點喎！

沈：無錯！我哋都好鍾意扮靚，見到新朋友，最鍾意將焦點放喺人哋嘅打扮上，哈哈！

Ｓ：當然仲有人生觀點都好似，又大家都係左邊面靚啲！呢個訪問你係主角，所以讓你坐左手邊。

沈：我哋仲有食嘢口味都好夾，可能因為我哋同血型Ａ＋啦，所以咁夾！

Ｓ：我哋仲好有默契添，如果同一大班人傾偈，有人講啲嘢好怪，我哋只要互相望一望，一個眼神就知大家喺度諗啲乜，有時仲會笑咗出嚟！計吓計吓，我哋都成日keep住有見面，除非大家都好忙，否則連續見幾日都可以大把嘢傾。

沈：無錯，我最鍾意上你屋企坐，以前你住青衣，我都成日去搵你，因為大家都係青衣之友，我上你屋企會摷你衣櫃，攞晒啲化妝品出嚟一齊研究，諗起都好開心。

互笠高帽優點多多

記者：你哋乜嘢都咁似，會唔會連揀男朋友、老公嘅品味都一樣？以前有無驚過大家會鍾意咗同一個人？

Ｓ：一定唔會，佢鍾意靚仔，雖然我老公都好靚仔，哈哈！

沈：（好驚訝）點會！諗都無諗過！

Ｓ：反而我今朝起身突然有種感覺，覺得你會唔會係我前世嘅老婆，因為我睇過本書講前世今生，本書話今世關係密切嘅人，上一世一定有一啲緣分，好似上世喺父親、妻子咁，今年就會慢慢轉化變成最好嘅朋友。

沈：上世係點無人會知，但今世你係一個乜嘢人，我就好清楚，我覺得你細心、大方、唔計較、靚、對自己生活有要求、好學，對朋友好真心，優點多到數唔晒，缺點就係衝動、性急，仲有講嘢直接，呢個係優點亦都係缺點，但我都係咁。

Ｓ：你嘅優點就係好乖、好潔身自愛，有時我會覺得做人應該瘋狂一吓，有啲衝動，但你就完全唔會咁做，好清楚自己要啲乜嘢。缺點就係無乜防人之心，入行十年，仲好似啱啱入行咁單純。愛情方面，你曾經講過好羨慕我呢一刻。

沈：係呀！你老公好好，對你同你囡囡都無微不至，100分！

Ｓ：就係因為當年我夠衝動，但你就唔會好似我咁，咁快嘭嘭聲做晒結婚生仔咁多嘢。

沈：我確實唔能夠咁衝動，以前未入行會諗，希望自己能夠22歲拍拖，24歲結婚，生個BB同我一樣係屬狗，因為我啲家姐都係同自己小朋友同一個生肖，好羨慕，入咗呢行，想法唔同咗，會以工作為主，加上未揀啱，無特別去諗，但因為我好喜歡小朋友，結婚一定會生小朋友，兩至三個就最好，一個太悶喇。

Ｓ：你絕對會係一個好老婆，10分滿分，你有9.8分，因為老婆應該做嘅嘢，你都會做得好好，你似家務做足又識煮飯，會好小鳥依人。

沈：咁你都係一位好好嘅賢妻良母，會以家庭為重，之前見你一個湊兩個，個慈母樣好正！

衣着被彈自爆嬲過

Ｓ：我哋互笠完高帽，不如講吓其他嘢，你知唔知我曾經嬲過你？

沈：知道，以前做節目，我話你着啲衫唔靚，之後你同我講，你唔開心嘛！

Ｓ：梗係，嗰半年你不下五次喺公開場合話我着件衫唔靚，有時仲話咁都可以上鏡呀！當時真係有啲唔開心o架！

沈：我就係因為當你係朋友，先至講，唔好朋友又點會咁樣提點，我只係想大家都可以靚靚咁出鏡，點知你咁小器，不過我知你唔會真係嬲嘅。

Ｓ：同你做咗咁多年朋友，你令我最感動嘅事，就係當我有唔鍾意嘅人，你都會比我更加憎佢，同我同一陣線！

沈：係呀，邊個蝦你，我會戥你唔抵，好想保護你。你都有一件事，令我好感動，記得有一次我搬屋，你義不容辭咁幫我手，仲記得嗰晚你要同老公出去食飯，着住條短裙仔，但見到我啲行李，你二話不說就一手抽起幫我搬，成個男人咁，真係好犀利，令我好難忘！

Ｓ：好多謝你接受我嘅訪問，希望我哋永遠都咁多嘢傾，咁好感情啦！

採訪：影視組

攝影：李柏儒

場地：台灣一品花雕雞（銅鑼灣）

徐淑敏

化妝：Tiffany Fong @ 26 Production

髮型：Eas Fu @ Chin. G