黃貫中被揭身家 藏獒值千萬

自從將性感女神朱茵「私有化」後，黃貫中（Paul）不時被懷疑身家不及女方豐厚，甚至被貶為「窮band友」。事實上，身為香港樂壇中流砥柱，阿Paul絕對稱得上是圈中另一名隱形富人，沒有入住豪宅，揸超級跑車出入的他，豪養五隻稀有的名貴西藏獒犬當另類投資，單是家中的寵物身價已逾千萬，認真不能輕視。

龐大如熊引人圍觀

前日下午四時左右，阿Paul和朱茵帶同家裏其中一隻現年6歲的五屆冠軍藏獒「寶帝」往旺角求診，體重160磅的寶帝，身形龐大如熊仔，被阿Paul拖實大搖大擺地出現，搶盡明星主人風頭，吸引不少途人圍觀。由於寶帝太巨型，進入診所有難度，加上為免嚇怕診所內其他「病友」，阿Paul只好帶牠到門外勞煩醫生和姑娘「出外就醫」。大隻寶帝被醫生一摸即溫馴地側臥，並乖乖由阿Paul捉起手腳讓醫生檢查。

不久，滿街途人圍住難得一見的藏獒，更有小女孩走近要求摸摸寶帝和合照，由於寶帝剛被醫生檢查未戴上口罩，阿Paul表現得小心翼翼，箍實寶帝頸項才讓人走近影相。未幾阿Paul更巧遇同是Band友的Joey Tang，兩人站在路旁大談狗經。

「寶帝」吸引大膽小女孩走近要求合照。

阿Paul與朱茵的情緣由「狗」開始，難怪二人愛狗至深。（資料圖片）

展示巨型分量狗藥

至於入診所幫愛犬取藥兼付款的朱茵，手持兩大袋藥步出，更笑笑口向記者展示巨型分量狗藥：「今次好多藥，因為係畀兩隻狗食嘅。」繼而友善地揮手上車，寶帝則由阿Paul打開七人車後座登車，「一家三口」齊齊打道回府。

記者致電阿Paul問其愛犬病況，他說：「佢皮膚濕疹，好小事，平時身體都好好。」及至講到寶帝身價不菲，阿Paul直言：「都好海鮮價，曾經試過有1200萬成交，亦都有人出200萬美金想買但被拒絕，寶帝係5屆冠軍狗，對上仲攞咗『最佳藏犬』，試過有人出400萬想買佢，我諗都唔使諗就拒絕！」

文、攝：追蹤組