周秀娜永久留疤美腿報銷

娜姐全身都值錢，去年更自稱為一雙絕世好咪投保三千萬，加上其42.5吋又白又滑長腿，難怪寫真銷量遠勝其他o靚模。可惜福無重至，她去年到馬來西亞拍電影《紙月亮》時發生意外，坐電單車後座時不慎右腳一跣，大髀內側滑落死氣喉，晶瑩如雪的美腿慘被灼傷，即時送院救治。

帶傷拍落水戲

當地醫生為娜姐外敷內服藥物消炎，更建議她多加休息，惟《紙》片趕工正酣，娜姐依然死頂，以為燙火膏萬能，四日後更去拍落水戲，不知不覺令傷口惡化。雖然一直在痛，但娜姐見傷口變黃以為結焦，依然愛理不理，卻不知道原來是膿水外滲，傷口呈現淺黃色。至個多月後電影煞科返港睇醫生，才知道今次灼傷並非小兒科。

香港醫生指她傷口的硬塊並非結焦，而是一團乾膿，不但令傷處不能透氣，導致未能埋口，傷口上更發現有霉菌孳生！由於未能及時病向淺中醫，娜姐得悉傷口可能是永久性疤痕，為此情緒插入谷底。醫生建議她搽藥膏先把乾膿浸軟，然後連續清洗傷口兩個月，期間須定時服食抗生素，直到去年十二月傷口才慢慢結疤。

擺甫士要就位

幸而《紙》片劇組早已為娜姐買定達七位數字保險，一般醫療費用悉數獲得賠償，可惜一條長達三吋闊兼半吋長的疤痕，凹凸不平烙印在大髀上，美腿盡毀！娜姐深知搵食工具極之重要，望可以做激光磨皮撫平傷疤。

記者致電身在內地拍戲的娜姐，提到美腿盡毀，她說：「整親嗰陣都唔知咁嚴重，之後先識驚，好驚隻腳好唔番，所以真係好想做激光磨皮囉！但醫生又唔建議我咁做，叫我搽住藥膏先。」問會否因此影響收入？她說：「咁又冇乜，但真係好麻煩，每次影相擺甫士都要就位，唔得就用電腦執靚佢。」

另外，被傷疤困擾的娜姐禍不單行，近日有傳她五官變臉，跟大S（徐熙媛）如倒模一樣。從她最近拍攝的內衣硬照發現，倒有幾分大S影子，令變臉疑雲更甚囂塵上。

文：專案組