琦琦知足 任達華讚抵錫
任達華（Simon）與琦琦向來是令人羨慕的一對，兩人相處之道，Simon揚言老婆要求低，他從未被刁難。但他亦十分識趣，為氹老婆歡心，用盡方法在法國訂了兩個特製手袋送給老婆，等足九個月的新年禮物，只為博琦琦一笑。
圈中模範夫妻任達華與琦琦兩個都是大忙人，但有一個宗旨，就是新春期間必定會放假與家人度過。兩人今年選擇到泰國與家人及朋友過新年，Simon說：「自從有咗個女後，所有嘅生活都係以女行先，去旅行都要揀啱佢玩嘅地方，我同佢最鍾意係游水，今次揀陽光與海灘嘅地方，個女話幾句我就冧晒，佢話乜就乜，我哋將來嘅嘢都係佢o架啦。」
9個月前法國訂製
凡事以女行先，至於對老婆，又有何表示？Simon笑着說：「我老婆要求好低，佢好知足又冇所求，但我都唔會忽略佢，新年我特別整咗兩個好靚嘅手袋畀佢，我喺法國拍戲時親手去整，等咗9個月，依家終於有貨，因為佢鍾意呢啲小玩意，一有時間都會周圍物色啱佢嘅嘢，只要佢開心就得。」
陪女歎熱辣辣新年
而琦琦同Simon一樣都係以女為先，她說：「以前新年會同Simon去啲自己想去嘅地方，瞓醒想去邊度就邊度，冇計劃，依家有阿女，事前都搜集資料，安排好晒啱佢嘅節目，要令佢每次去旅行都覺得好豐富。今年阿女揀去泰國，大家都覺得好好，唔想過凍嘅新年，想享受一個熱辣辣嘅假期。」
採訪：名人組
場地：ifc