古巨基獲Lorraine御准 行桃花運
忙於為本周末（4日）澳門巡迴演唱會操練、排舞的古巨基，由於個唱有一part要露臂，故已操到手瓜起𦟌，昨日他去健身時更搞爛gag笑說：「新年前隻老鼠瞓咗覺，練咗兩日醒番，我右手個隻叫米奇、左手叫米妮，一聽到教練話操，米妮就話咪嚟。」而他的歌衫全屬貼身款式，經過新年放縱狂吃，他說︰「比最弗時候係多咗啲肉，但有個底都易操番。」
過年開賭
另外，新春期間基仔出席多個聚會團拜，他笑言：「有殺冇賠，（你成日贏錢？）係呀，以前啲朋友見到我鬼見愁，但今年我抱住仁慈嘅心回饋大眾少少，每逢我做莊，佢哋就係咁嗌我首歌『爆了』，真係次次畀佢哋嗌中，我諗《爆了》係啲朋友賭局度已成為金曲。」每年基仔都預了五位數作開工利是。問Lorraine可有向他拜年？他笑說：「佢梗係要同我拜年𢭃我封利是，（畀佢最大封？）佢會知嘅。」
互送桃花
此外，基仔日前跟經理人霍汶希到維園行年宵，兩人更互送桃花，他笑說：「聽講人哋送桃花比自己買更好，桃花代表人緣，梗係好，（想行桃花運？）最好行埋，（Lorraine知你想行？）佢都想我行，仲好支持、鼓勵我添。」
文：音樂組