黃凱芹默認做老竇
黃凱芹（Chris）昨日宣布將於三月假紅館開騷，移居加拿大的他自言是非一般歌手：「自己唔識Do唔識做，唔好話亞太區男歌手，連金曲都未攞過，但託賴我有自己生存方法，頒獎禮有佢嘅遊戲規則，邊個攞獎唔代表一切，大家唔需咁勞氣，將人當成箭靶，攞獎可能係苦差。」似暗寸林峯奪「金曲金獎」惹批評。
對於年前被影到在愉景灣湊仔，問是否已婚生仔？Chris說：「私人事唔想同大家分享，不過為滿足大家需要，只可講我嘅家庭生活幾愉快，其他問題微笑回應，我唔想用呢啲宣傳，唔想講個仔食幾多碗飯屙幾多屎，我唔係嗰種歌手，大家心知肚明，已經影到相。」言下之意，似默認做了父親。