G.E.M.彤愛音樂 化「敵」為友

我覺得自己的事業好順利，唱片公司給我好大自由，由於只有我一個歌手，所以萬千寵愛在一身，就算我想做幾浮誇、幾偏離市場的音樂，公司都接受，而且經理人識音樂好重要，他才會尊重你，加上我的監製好勁，我們就似鐵三角互相幫助，我好慶幸自己在這間公司，唔需要如其他歌手般，紅了就被公司安排去拍戲，根本完全唔關音樂事，偏離自己方向。

拍電影只愛客串

因為自己唔叻做戲，間中客串一、兩個角色就好玩，但一年只有365日，叫我用100日去拍戲真係唔得，始終自己最大興趣是音樂，而且我覺得自己唔適合做女主角，擔心會因演技稚嫩搞差部戲，無謂自製機會畀人批評！但如果有人睇起搵我做女主角，當然無任歡迎啦，哈哈！坦白講，我唔想自己造成不良影響，我覺得無論唱歌、拍戲，如果為了想賺更多錢而去做，真係唔做好過做，因為出來效果一定唔好。

G.E.M.坦言欣賞Mag愛音樂的態度。

G.E.M.與Mag不論外形、唱功、台風等經常被拿來做比較。

約定在紅館相見

之前外間常將林欣彤（Mag）跟我比較，初時覺得不明所以，為甚麼要將我們扯埋一齊呢？她根本唔關我事，以前自己不是成日追睇《超級巨聲》，因為好多人講Mag，我就留意多了，發覺自己幾鍾意她，我們見過幾次，覺得她為人好真誠，對音樂純粹出於鍾意，唔係想紅、想多人識，自己好欣賞擺晒心思在音樂上的人，所以她出碟我也會買來支持，亦不會覺得對方是威脅，大家年齡差唔多，又鍾意音樂，相信有機會做好朋友，之前我開騷她有來睇，我跟她說，如果她在紅館開騷，我也一定去捧場。

口述：G.E.M. 筆錄：音樂組