何超盈落寞返港 唔認情變

何家淑女超盈傳出與拍拖約四年的男友Greg情變，有指她相約女友人出埠旅行散心，日前有讀者報料指超盈與女友人出現在韓國首爾，預備飛返香港。

記者趕往機場守候，果發現超盈與𡃁模「爆E超蓮」鍾采羲（Iris）於晚上約十時抵港，惟同行未見男友Greg。貴為何家千金的超盈親自推着一大車行李出閘，期間不停講電話似與司機聯絡。

女去購物男往滑雪

超盈和Iris步往停車處時，邊走邊講電話的超盈似乎無厘心機，不時頭耷耷一臉落寞，其後她往書店看雜誌，又到附近的便利店買零食，之後往停車場邊食零食邊等司機接載回家。

事後聯絡超盈時她卻堅決否認情變：「吓，冇咁嘅事！男友有一齊去，但大家有啲時候分開玩，男友鍾意滑雪，我哋咪去買嘢囉。我哋拍咗拖就快四年，從來冇分過手，Greg唔係名人，好低調，比較少出嚟。佢做建築嘅，有時要工作就陪唔到我，總之我好多謝佢一直喺我身邊。」

Iris認衰拆散鴛鴦

至於Iris則說當初大家同乘機去韓國，在當地則各有各玩：「我同超盈及女仔朋友去首爾shopping，Greg就同其他朋友去滑雪。」護友心切的Iris還說：「最後嗰日諗住約埋Greg同超盈，不過最衰係我啦，叫超盈唔好重色輕友，佢哋返到香港都成日見啦。」Iris又自爆返港後才發現遺失iPhone，手機內有很多韓國旅行相，無奈全部冇晒。

文、攝：追蹤組