寡言霆鋒見Eason 變開籠雀
梁漢文（Edmond）前晚於個唱尾場邀得很少在港表演的謝霆鋒伴奏，好友陳奕迅（Eason）亦撐拐杖上台。Eason與霆鋒闊別十年再度同台，寡言的霆鋒一見Eason即變開籠雀，兩人一人一句互窒，笑爆全場。
Edmond一連兩場演唱會前晚圓滿結束，更邀得久未於香港演出的霆鋒上台彈結他伴奏。戴黑超及鴨嘴帽的霆鋒甫上台即獲熱烈掌聲，一向寡言的他於台上大讚Edmond：「佢係我好尊重嘅朋友、歌手、丈夫同仔，我一世都追唔到，你有咩吩咐到，阿仔（即霆鋒）一定做！」之後Eason亦上台表示：「Edmond令大家聚埋一齊，我都好耐冇見呢個大陸仔（指霆鋒），上次同台已經係十年前。」霆鋒見Eason撐着拐杖表示擔心，他笑言：「驚你有咩事要抱你落台，你知你好重o架啦！」
超時被罰6位數
當Eason與Edmond合唱《大激想》時，霆鋒即急腳落台。Eason又自爆曾為Edmond險與高層反面：「我成日同啲高層講Edmond唱歌好聽，但佢哋覺得麻麻哋，我完全唔認同，差啲想反面！」他強調做歌手不一定要唱國語歌。
Edmond獻唱《一百巴仙愛上你》時，因企得太近放煙花位置，故放煙花被嚇到退後。他又鼓勵大家遇到挫折時要思想正面。至安歌部分，一眾好友霆鋒、Eason及劉浩龍等齊齊上台合唱串燒歌，表現極high。一向cool爆的霆鋒亦被感染，於台上又跳又唱，一改平日cool爆作風。最後演唱會於11時58分完場，被罰近6位數。
梁漢文露肉近底線
Edmond於慶功宴上坦言不知如何答謝一眾好友。對於有指丁子高不批准老婆楊千嬅再上台，Edmond指對方有身孕，當一場嘉賓已足夠。其太太Karen有份設計是次服裝，Edmond表示露肉程度已近底線，稍後會與太太去旅行充電。
文：音樂組