朱晨麗劈腿 港男李晉強變小三

現年24歲的應屆香港小姐朱晨麗與同齡的香港先生李晉強，因合作而擦出愛火，秘密拍拖三個月。本報於年初三更獨家拍得二人在港鐵車廂內卿卿我我，猶如普通情侶一樣，眾目睽睽之下變「黐頭芒」竊竊私語，李晉強更一手拖着朱晨麗坐下，並將頭挨落女方的膊頭上，氹得朱晨麗笑逐顏開，甜蜜到爆！

傾得埋冇戒心

朱晨麗昨日以應屆香港小姐冠軍身份，陪同高層梁乃鵬出席無綫新春團拜，她被問到與李晉強拍拖一事，她否認說：「我哋唔係拍拖，因為我冇親戚喺香港，嗰日其實約咗一大班朋友食飯，咁啱只係影到我哋兩個啫。（佢挨落你膊頭喎！）佢都答咗係Hea住咁樣，其實朋友同朋友傾得埋，係唔會有戒心，咁啱影到啫，呢啲係影相嘅角度問題。」

朱晨麗在未入行前，於芭蕾舞團認識烏克蘭籍男友古思宇。

李晉強和朱晨麗因多次合作而撻着。

提起「新歡」李晉強即時冧爆的朱晨麗難掩喜悅，但講起「正印」烏克蘭籍男友古思宇時，便口窒窒兼「變臉」，收起笑容說：「點講呢……都仲係嘅（指拍拖）。」

朱晨麗指當日李晉強是「Hea着」，而不是挨着，其解釋牽強之餘也相當「Hea」。	朱晨麗承認與「正印」男友仍未分手。	日前李晉強又被本報拍得甜蜜蜜傾電話。

唔怕男友呷醋

雖然朱晨麗與李晉強拍拖斷正，但舊愛情絲仍未斬纜，擺明「一腳踏兩船」，但她卻死撐說：「每個人都會有男仔、女仔朋友，如果只係一齊玩都可以咁講，仲得了嘅。（李晉強有意追你？）吓……朋友嚟啫，呢方面你哋要問番佢喇。」朱晨麗自辯與李晉強只是正常的朋友往來，相信正印男友不會吃醋，更沒有必要解畫。記者再問到為何當日「斷正」後彈開兼驚惶失措？她說：「唔係驚青，因為嗰日冇化妝啫，Artist冇理由唔化妝上鏡嘅。」

至於被無綫安排到藝員訓練班上堂的李晉強，日前放學後，與普通員工一樣要逼港鐵，沿途他戴上耳機不停講電話，更講到七情上面，表情多多，似乎是與朱晨麗談情。其後李晉強沿港島線過海，直到銅鑼灣站落車後，步行往中華遊樂會。

採訪：影視組