姚予晴多人追密冚戀情
名模姚予晴（Mikki）與拍拖10年的男友曾朗鳴（Sunny）在農曆新年前宣布分手，這邊廂Mikki坦言不乏追求者，但表示若再墮愛河，肯定不會公開，而另邊廂的Sunny則偕友到哈爾濱，藉冰凍療情傷。
Mikki回復單身後的首個農曆新年，返上海跟家人度過，感到好開心，對於今年沒有男友會否感受特別深？她說：「都會，都咁多年，不過做番朋友都OK，（親戚有冇問起？）家長唔會過問。」至於擇偶條件，Mikki表示從來不會要求高大靚仔，亦不介意高度，只要求男人有責任心，以及希望對象是圈外人，自言不相信一見鍾情，故對愛情寧缺勿濫。
再拍拖低調
問到現時有沒有追求者？Mikki坦言：「都有，但睇定啲先。（當中有冇可以發展嘅對象？）都有。（閃婚？）一定唔會！拍拖半年內就結婚對我嚟講太快，一年就OK。」曾跟Sunny同居的Mikki更直言以後不會再跟男朋友同居，以保留私人空間，並希望拍拖事低調，若將來拍拖不會再講，她說：「男友唔會再講，老公就講。」
復合機會微
至於甩拖的Sunny，在剛過去的農曆新年，則隨友人到哈爾濱，度過了一個零下20度的冰凍新年，他說在戶外走時，頭髮即時結冰，皮膚赤痛，揚言有真的會凍死的感覺，問他莫非想藉冰凍療情傷？他說：「唔係，我冇乜嘢，唔係我控制，都要接受，（喺哈爾濱有冇艷遇？）好奇怪，可能汗腺問題，我吸引到男性，吸引唔到女性，哈哈！」至於與Mikki有否復合機會？他感慨地說：「微啲！」模特兒出身的他，現已轉型做新加坡公司的營業部經理，不過業餘他仍愛做跟時裝有關的工作，是次到哈爾濱有望在當地闖出商機。
文：名人組
姚予晴服裝：中藝
場地：Tiffanny Flowers