杜汶澤送碌柚葉除黑氣
與江若琳合作過不少電影的杜汶澤，於微博得知Elanne在內地被無良司機於高速公路趕落車，即轉發其微博抱不平，但怎料一句「黑仔Ling大陸拍劇遇上野蠻司機」的留言卻掀起網友罵戰，阿澤最後以「怕咗你哋，刪咗喇！黐×線，乜×都有得鬧」勞氣地刪除留言。
阿澤談及此事說：「有啲網友係咁鬧，話我用『大陸』呢個字眼係歧視，根本唔係咁樣，我只係對事，如果Elanne喺法蘭西遇到無良司機，我都係咁寫，只係將大陸變成法蘭西啫！都唔明白點解佢哋會咁諗，好無奈，我唔想再加深香港人同內地人互相批評呢啲惡性循環，所以決定刪咗段留言。」
對Elanne昨日的遭遇，阿澤指她近期黑到爆，笑言要送幾籮碌柚葉給她沖七七四十九日涼，辟除黑氣，他打趣的說擔心Elanne將跟他宣傳新戲《高舉‧愛》，到時黑氣會惹到他。