前港姐冠軍葉翠翠（圖）早前獲相士批她龍年行大運，財運、愛情運孖住上，令她心情興奮地迎接龍年來臨：「當堂放心晒，前幾年都有畀人批過，如果話我行衰運時就會樣樣嘢都小心啲。」不過，運勢強勁的她今年只屬霧水桃花，就算拍拖也不會長久。
向來廚藝精湛的她早前特地去學整年糕，打算整一批送給親友。由於其母打算新年期間待在家中，不外出飲茶，翠翠更特地請教點心師傅如何整馬拉糕！雖然仍未落手整，但她都充滿信心：「咁整乜都要經過失敗先會成功，我已知道晒啲步驟，到時點都會整到嘅！」
