克勤兩仔飽飽滯 唔追龍女
李克勤率領關楚耀（Kelvin）和Mr.全男班賀年，為生猛的龍年增添陽光氣息，已是兩子之父的克勤心滿意足，無意追龍女變「三個吃不消」，他笑說：「已經好似食咗兩碗飯飽飽滯滯，夠喇！」
今日大年初一，「環球一哥」李克勤約師弟關楚耀（Kelvin）、Mr.成員Alan、Dash和Ronny食飯賀年，齊擦蠔皇鮑片和當紅炸子雞，大講男人經，希望新一年男子組好運齊來。已婚的克勤還向各人大派利是，並說：「祝大家新年快樂、心想事成、萬事如事、盆滿缽滿。」
花6位數派利是
克勤跟老婆盧淑儀育有兩個寶貝仔，問會否趁熱鬧追個龍女「小盧淑儀」？剛吃飽賀年飯的克勤笑說：「飽滯啦，好似食飯咁，依家食咗兩碗飯滿載而歸，齊齊整整，真係冇咁多愛心、時間生多個。」
農曆新年克勤會放假陪家人，初一會到父母和岳父母家拜年，還準備了6位數大派利是，他笑說：「我真係覺得肉痛，不過爸爸教我派得多利是係好，證明過去一年有進帳，豐衣足食。」問給囝囝的利是是否最大封？克勤說：「唔係錢嘅問題，意頭嚟。」
望再做左麟右李
至於初三克勤就跟朋友開大食會玩財富轉移，他說：「以前過年做『左麟右李演唱會』，工作人員喺後台玩魚蝦蟹財富轉移兼打邊爐，雖然好離譜，但真係好開心。（有冇偷食？）我同阿倫（譚詠麟）都係聞吓咋，開騷唔敢食，我哋仲派咗幾百封利是畀所有工作人員，觀眾畀我哋嘅利是就捐晒出去做善事。」
克勤寄望2013年可再做「左麟右李演唱會」跟觀眾拜年。
採訪：音樂組
攝影：劉智源
場地：香港港麗酒店
化妝：Angel Y.（李克勤）／Circle Cheung@ND & Co.（關楚耀）
髮型：Adolph Bow（李克勤）