熊黛林等城城情侶檔

做咗模特兒咁多年，依家會偏向演戲方面嘅發展，目前我鍾意演戲多啲，行騷已經好少，多數都係以嘉賓身份出席活動。演戲對我嚟講難度一定有，要演得出色，需要有演技同經驗，同埋要畀好多心機，一啲都唔容易。

想演古裝妖精

不過我唔會喺屋企自己對住塊鏡練戲，硬係覺得自己對住自己個感覺好奇怪。我都試過抽離唔到角色，試過演一個經歷好慘嘅角色，拍完後一個星期我仲日日係咁喊，明知係戲入面嘅角色，但我太過投入，一下子抽離唔到。喺電影方面我係新人，好多嘢都想嘗試，我想試下拍古裝片，好似《畫皮》嗰啲咁，我覺得人同妖相戀嘅故事好吸引。

熊黛林坦言考慮過幾年結婚。城城，收到未？（設計圖片）	熊黛林與陳慧琳、古天樂等合作笑片，獲益良多。	熊黛林拍拖，自認溫柔體貼。

今年賀歲片入面我就飾演一個失明嘅女仔，對我嚟講係一個挑戰，我特登去盲人學校上堂，體驗一下佢哋嘅生活，希望可以將佢哋樂觀積極嘅一面演繹出嚟。我本身有大近視，拍呢部戲時我索性連隱形眼鏡都唔戴，結果出嚟嘅效果好自然。

目標大壓力大

自己算好好彩，拍戲至今都冇試過好多NG，大班人一齊拍嘅群戲就會麻煩啲，要夾好多嘢，試過十幾個take先OK。而最辛苦嘅一次係有日我發緊燒，嗰日好凍，我拍外景已經吹咗成日風，跟住去到室內，由幾度去到一間有廿幾人好焗嘅房，好辛苦，好似抖唔到氣咁，但係成crew人等緊，唔可以停落嚟影響個進度，嗰刻我覺得自己就嚟暈，成個人已經唔清醒，一拍完後我即刻除低件戲服不停深呼吸先好啲。

雖然拍戲遇過唔少辛苦嘅經歷，不過我從來都冇諗過要放棄，我好享受個過程。有好多人都問過我，喺演戲方面會唔會以郭富城為目標？佢係影帝級人馬，我只係新人，同埋我唔會攞人哋嚟做目標，因為目標愈大壓力愈大。我都唔會問佢有關我演戲方面嘅意見，我驚自己問埋啲嘢好小兒科，唔敢問。

欣賞男友做戲

我當然欣賞佢演戲，佢係影帝，演技好係公認嘅。如果有機會，當然唔介意同佢一齊喺戲入面合作，合演咩角色都冇所謂，就算係做情侶都冇問題，做演員應該咩角色都嘗試。

唔要工作狂老公

啲人成日問我做咩唔公開戀情，其實我冇諗過要公開，我係寧願唔答都唔想講大話，但我唔會刻意隱瞞。好多女仔到咗某個年紀都會恨嫁，不過我已經過咗嗰個階段，早幾年反而會恨嫁，依家就冇咗呢種感覺同諗法，過多幾年至結婚都OK。

對我嚟講結婚係一定要嘅，係保障嚟，對所愛嘅人有一個責任，我嘅老公唔可以只係掛住工作而唔理屋企，要識得分配時間同取得平衡。我唔知自己將來會唔會係一個好老婆，盡量啦。至於生BB就兩個夠喇，最好梗係一仔一女啦。

嗲下鍾意嘅人

我覺得要維繫一段關係最難嘅係要互相遷就同理解對方，唔好亂咁諗，唔好咁大疑心，同得佢一齊就應該信任佢，對自己亦要有信心，咁段關係先至健康。我覺得自己都算係一個好女朋友，唔需要人擔心，幾溫柔體貼。其實我性格係幾急，當遇到啲嘢唔喺我掌握之內，我就會變得好急。我唔覺得自己特別嗲，都係好似普通女仔咁，對住鍾意嘅人會嗲下佢，好正常。

口述：熊黛林

筆錄：張嘉敏

攝影：林楠瀋陽傳真

服裝：HUGO BOSS