爆賭王催婚 超雲享受現在 未諗嫁山聰
賭王千金何超雲與男友陳山聰前晚拍拖出席活動時，齊聲否認於雅柏苑同居的傳聞，他們只是到上址吃飯旺一旺，並指現在的相處方式很好，無需要改變。超雲又透露父親有催婚，但她表明暫不會考慮。
賭王何鴻燊與三太陳婉珍的千金何超雲，前晚與男友陳山聰以襯到絕的情侶裝打扮出席時尚會所MAGNUM Club開幕派對，其他嘉賓還有謝天華、莊思敏和Alice B等。早前有報道指超雲與山聰於三太名下的雅柏苑築愛巢，超雲否認說：「我覺得依家拍拖嘅相處方式好好，無需要改變。（畀人影到喺嗰度出現？）我講過呢個係我細個住嘅地方，係媽咪嘅，最近重新裝修，我哋上去食飯旺一旺，媽咪會租出去定自住都未知。嗰日仲有好多人，唔知點解報道咁寫。」而山聰亦與女友口徑一致。
拍拖日子尚短
對於麥玲玲批兩人今年會雙喜臨門，超雲說：「咁犀利？多謝先，我哋都未諗。（有冇計劃結婚？）到時大家會知，我好Enjoy依家嘅生活，大家拍拖日子尚短，遲啲先諗。（爹哋有冇催婚？）佢個個都催架啦，但我話佢聽唔會住。（見過男友家長未？）唔想答。」山聰亦表示兩人暫未有計劃結婚，又透露農曆新年會跟賭王及三太拜年，至於可會一起吃團年飯？他謂未收到通知。提到超蓮近日被傳跟一四眼男生Leo拍拖，身為家姐的超雲說：「個男仔我都識，佢成日嚟我哋屋企食飯，係妹妹識咗好耐嘅朋友，問番妹妹啦！」
另外，同場的莊思敏則谷胸上陣，但她指裙子胸部位置有啲鬆，雖做足安全措施，但不可以太大動作，至於是否增加吸引力？她笑言：「未有王子，青蛙都冇隻。」
文：名人組