許廷鏗冇大冇細搶高層利是
歌手許廷鏗（Alfred）與鄭欣宜橫掃多個新人獎，為感激唱片公司過去一年的栽培，他們聯同師姐吳若希（Jinny）化身「阿四」返公司大掃除，不過三人似玩多過做，公司高層更被他們明搶利是！
Alfred、欣宜在年頭的各大頒獎禮中成績彪炳，成為新人王。為答謝唱片公司力捧，兩人日前相約Jinny返公司為同事服務，合力清潔會議室。三人手執吸塵機、地拖及除塵掃，但似開派對多過清潔，竟將清潔用品當咪高峰唱歌，又互相對打搞搞震。當唱片公司高層何哲圖巡視時，三人要求「老闆」提早派利是，欣宜和Jinny出手明搶，Alfred則用吸塵機吸，寓意自己成為吸金王。
必穿新內褲過年
甚少做家務的Alfred坦言多數由母親代勞，他最討厭是洗廁所，因怕有異味及污糟。問有何過年習俗？Alfred謂：「大年初一會着媽咪買嘅新底褲，阿媽又唔准我洗頭，不過我怕唔洗會多頭油，所以會偷偷洗。」欣宜自稱最愛掃地，但最憎洗碗。問可會因減肥而戒食新年食品？她說：「我想做開心嘅人，唔會再戒口，乜都會食，但當然唔會太瘋狂啦。」Jinny則稱新年會回鄉探外婆及外公，狂擦家鄉美食外，亦會到日本喪買。她稱：「我一年見得婆婆一次，所以一年前已同公司請定假，有騷都唔接。（買乜禮物畀婆婆？）梗係錢啦！」
文：音樂組