基仔黐實女友甜蜜慶生
古巨基在得力助手Lorraine陪同下到韓國領獎，細心體貼的基仔多留兩天在首爾遊玩，原來是特別為Lorraine慶生，基仔又在微博公開祝賀得力助手，兩人的「緋聞」關係逐步浮面。
基仔前日在韓國「7th Asia Model Festival Awards」獲頒「亞洲明星獎」，同行還有他的得力助手Lorraine，原來昨日乃Lorraine生日，基仔於下午時分不避嫌在微博公開留言：「我的得力助手，happy birthday！」並上載了一張狀似蛋糕的忌廉西多照片，擺明正跟Lorraine撐枱腳歎tea。
據知基仔更會在首爾多留兩天特別為Lorraine慶祝生日，身在韓國的基仔昨日透過長途電話說：「我會留喺韓國玩多兩日，（特別同Lorraine慶祝？）你估吓啦，我哋成班同事一齊陪佢過生日，熱熱鬧鬧，（送佢咩禮物？）未有喎，佢喺我隔籬，不如我畀個電話你，你直接問佢。」怎知聽到基仔叫Lorraine，她嚇到即刻閃走。
讚少女時代舞技勁
在「7th Asia Model Festival Awards」中基仔跟韓星崔智友、當紅組合KARA同獲頒「亞洲明星獎」，基仔首次於韓國領獎，他說：「好開心，我搵咗翻譯教我講幾句韓文致謝，（觀眾咩反應？）好開心囉，（笑你發音咋）我諗唔係笑我，係讚嘆同驚喜。」基仔自覺跟韓國好有緣，短短半年就到了韓國三次。另外他又接受《朝鮮日報》訪問，談到近年中韓在電影、音樂上有好多合作機會，他說：「我都期待有咁嘅計劃，韓國樂壇好蓬勃，對少女時代、miss A較熟悉，佢哋唔單止有外形，跳舞都好精彩。」
此外，後日年廿九基仔會到廣州參加春晚直播演出，因為二月初要到澳門舉行演唱會，所以新年也只得兩、三日假期，他笑說：「好慘，一年一度呢啲大日子都要忍口，唔可以食咁多，不過年初一我會畀自己放縱一日咁多。」
文：音樂組