蔡楓華緬懷風光揸波子

錢對我嚟講自給自足就OK，想一路一路好落去。作為知識分子，所以成日會問「啲錢足唔足夠？」唔足夠就去搵，足夠係咪代表唔搵錢？唔係！因為錢係需要同必要，冇人會嫌錢腥，足夠都要繼續去搵。

理想大過金錢

好多人都認為錢愈多愈好，當然呢個係事實，你問我依家夠唔夠？好肯定咁講「未夠」，但我唔係純粹為錢，我係一個為理想多於為錢嘅人。講真，自己絕對唔係一個大花筒，真係好慳，今日嘅蔡楓華搵一蚊只使一毫子，好唔贊成依家嘅Artist搵一蚊使十蚊、甚至一百蚊，就算以前好景都唔會咁使錢。

愛香港棄移民

我最大敗筆係唔識得投資，97年嗰時困擾咗我好耐，嗰陣成日諗住移民，諗住揸住啲錢移民去美加，最終發現都係香港最好。我唔知乜嘢係最風光，一直都冇自己物業，淨係揸住啲錢，但又唔係多到使唔晒，不過尚算衣食無憂，出嚟食幾千蚊一餐OK囉，有兩架車、揸波子咁大把，唔算好風光，只係比同年齡嘅人多少少，因為當年我唔係真係賺好多。

講真，90年之前好多紅歌星、紅明星都唔算有錢，最多都係搵幾百萬至千萬，90年後就真係賺好多，因為有大陸市場Support！四大天王其中一個90年前真係只得幾百萬身家，但90年後就完全兩回事，冇得比！

後記：

訪問當日，「紅唇王子」Ken依然架着招牌墨鏡，寧死不脫，攝影師哥哥叫他笑一笑，Ken勉強擠出靦覥式笑容，他說：「由細到大我都唔識笑o架，依家經濟唔好，更加唔識笑！」若大家不想Ken永遠絕對空虛，就支持一下蔡楓華人生第一個紅館演唱會吧！

口述：蔡楓華　筆錄：專案組