黎淑賢大控訴 催生冇床位
即將臨盆的前亞姐黎淑賢，因為胎兒過大，令她感到身體極度不適，本想提前入院催生，卻被預訂之私家醫院以冇床位拒絕，令她十分激氣，大鬧政府縱容內地孕婦，令本地孕婦苦不堪言。
黎淑賢下嫁皮膚科醫生許智政後生了一個兒子，即將誕下第二個仔，連同前夫盧惠光的兩個兒子，今胎已是第四個，可謂多仔婆，她的預產期本是本月底，一向採用自然分娩的她，近日因胎兒過大，令她每行一步下盤都劇痛，為安全計，在醫生建議下想提早入院催生，無奈由上周開始向已預訂的私家醫院預約入院日期，但院方以近兩星期都沒有床位為由拒絕，令這位大肚婆氣結不已。
腹中胎兒七磅幾
黎淑賢說：「真係好離譜，book咗兩星期都話冇床位，話除非我流血或者穿羊水，咁就可以算係緊急情況畀我入院，醫院話最快月尾先有床位，都到我預產期啦，book嚟有鬼用咩，一係就話年初一有位，但費用就加倍，叫我點揀？」
黎淑賢腹中胎兒目前已有七磅幾，醫生預計到預產期隨時超過九磅，但她不想生得太辛苦，又苦於冇床位生仔，近日惟有節食，希望食少一點，令胎兒減慢增磅。
她激動的說：「我最怕發生醫療事故，個胎過大，生爆咗我冇乜所謂，最怕係個BB逼到骨裂，咁樣點計先？真係好鬼嬲！我又唔想扮肚痛入院，影響咗真正有需要嘅孕婦。」
對於政府在立法會提出多項措施打擊內地孕婦來港產子，黎淑賢一聽就更加激動：「我今日睇電視，愈睇就愈火滾，搞成咁係香港政府一手造成，我哋香港啲大肚婆就好似打開屋企門，見到間屋畀啲親戚霸晒，連自己張床都冇埋，要瞓就自己諗辦法！」
「苦肉計」快生啲
她又透露過往三胎，可以在懷孕六個月才預訂醫院床位，但今胎於懷孕四星期就要預訂床位，直言情況實在太離譜，為了一洩心頭憤怒，她更在facebook爆粗大鬧「生仔冇床位，The city is dying！」獲不少朋友留言同情她。
為了可以盡快進入「緊急情況」，黎淑賢想出苦肉計，昨日挺住大肚忍住下盤痛楚到金鐘購物，她揚言：「要行多啲，咁樣可以快生啲。」似是對自己諷刺。
文：影視組