蔡楓華致命初戀：真係好悲慘
情可救人，亦可殺人。歸根究柢，蔡楓華於樂壇之死，並非一句說話所致，一切也是源於情。因為一段初戀，Ken寧可放棄事業，甘願為情頹廢一生，何苦呢？
曾經有一段刻骨銘心嘅愛情，令我依家都揮之不去。呢段情係我初戀，喺十幾廿歲時發生，對我嚟講影響好大，直情可以令我犧牲事業去結婚，但個女仔最後跟咗第二個男人走，變相即係話我失戀。
我一失戀就轉入死胡同，個腦唔識轉，依家啲人失戀可以即刻忘記之前嗰個，去識新嘅一個，但我嗰陣完全唔識調節，忘記唔到舊嗰個，新嘅又識唔到，所以就非常辛苦，完全冇心機做嘢，對我嘅人生事業有好大影響。
做偶像派拍拖好難頂
呢個女仔係圈外人，佢從來都唔鍾意我做娛樂圈，唔喜歡出街畀人指指點點，拍拖要拍到私私縮縮，好唔自然。嗰時做偶像派真係好慘，拖手又唔得，連行街都唔得，成日要玩地下情，想走上地上從來都唔得，你試吓拖又唔拖得、錫又唔錫得個女朋友，又驚畀記者影到，真係好悲慘。以前唱片公司一知道你有女朋友，真係好唔鍾意。
唱片公司嫌老
我記得29歲時，唱片公司嫌我太老，話我唔適合做偶像派，即係借啲意要炒我，29歲就叫我走，真人真事，依家好多四、五十歲一樣做緊偶像派，我都仲係做緊偶像派，死唔死？
講番嗰段情，冇理由叫個男人犧牲晒所有嘢，當時歌迷會有五千人，肯唔肯放棄晒呢啲資產呢？唔肯的話呢段情好難繼續落去。都好嘅，雖然冇聯絡，我都知個女仔依家都仔大女大，我都好安慰。依家我都有心儀對象，阿媽都不斷向我催婚，但我都係做完個演唱會先向大家交代，因為做唔到演唱會，就誓不為人。
口述：蔡楓華 筆錄：專案組