周秀娜千萬創業賣Bra

近年轉戰內地市場的Chrissie吸金力驚人，拍戲拍劇及代言廣告，已搵近2,000萬港元，其中她於去年擔任內地內衣品牌Lamiu代言人已賺到豬籠入水！眼見除了宅男錢好賺，內地的內衣市場亦充滿商機，最近Chrissie便小試牛刀，豪擲超過七位數投資內衣生意，於新一年榮升內衣店「老闆」，希望吸盡宅男少女的荷包。

過萬份訂單

今次Chrissie可謂出錢又出力，據知她與內衣品牌Lamiu合作，共投資約800萬人民幣（約1,000萬港元），推出名為「秀娜系列」的內衣，專攻內地少女市場。Chrissie更落手落腳參與系列的設計工作，打造多款非常性感的內衣，而她亦以自己的32D逼爆上圍作生招牌，擔任自家內衣系列的代言人，早前她更穿上親自設計的內衣拍攝宣傳照。

精明的Chrissie不假手於人，利用自己的32D上圍宣傳。

放大圖片

首次做「老闆」的Chrissie拍攝宣傳照亦搏到盡，谷行事業線兼擺出多款誘人姿態，又跪又瞓，非常噴血，藉此吸引更多客戶購買。據知該內衣系列前日正式推出，而且於內地多個地方發售，而每套內衣約售200元人民幣，據知內衣上架僅一天，網上已有過萬份定單，反應非常熱烈。

圓夢入商界

昨日致電Chrissie問投資內地內衣生意一事，她直言︰「之前已經諗住推出自己嘅內衣系列，依家可以推出真係好開心，而且我一直都好想搞生意，新一年能夠實現夢想係一個好開始。」對於今次投資金額近千萬港元，Chrissie表示首次投資這樣大的數目，更對自家內衣系列充滿信心，她說︰「之前有入股自己公司，但數目冇依家咁多，投資咁多錢可能有少少風險，不過我對今次嘅內衣生意好有信心！今次嘅設計我想同女生分享自己Push Up嘅小秘密，因為我對呢方面有經驗，知道點樣先最吸引人！」

此外，她不忘感謝內衣品牌的支持，表示雙方合作愉快︰「大家一路合作得好好，佢哋知道我想出內衣品牌，即刻搵我一齊合作，而且對我嘅設計冇乜限制，自由度好大！」

文︰專案組