陳煒單車環台 為善盡踩
已嫁為人婦的前亞姐陳煒，愛行善助人，最近與義工朋友參加於台灣舉行的環島單車籌款活動，七日行程踩足六日，少奶奶陳煒坦言抵受不住「辛勞」，慶幸「安全」回來，並以個人名義籌得二萬多港元，總算有交代，又可為自己寫下人生一頁創舉。
全程300公里的單車環台籌款活動，目的為中國內地西北山區起「水壩」，陳煒應一位義工朋友之邀「膽粗粗」參加，事前未有預計太辛苦，陳煒以為踩吓單車欣賞風景，當累時又可上車坐代步，這個環島之旅又可籌款幫人，何樂而不為呢？
雙膝瘀晒
怎料到出發那天，陳煒便進入了難以想像的辛勞之旅。她透露七日行程中踩足六日車，每日清晨六時起床便出發，日日踩足五小時，每日踩公路和斜路，過程驚險萬分，她笑說：「我傷晒呀！兩個膝頭都瘀埋！瘦咗成個碼呀！不過都覺得自己好叻，我十歲時踩過單車後就冇掂過，但其他團友都係經過訓練o架！所以我成個行程踩唔掂，導師團友會幫我踩或推我囉！（期間遇驚險事？）踩公路好多大貨車都幾驚o架！大隊攝影機拍我時，我掛住望又控制唔到架車，成日撞落部機到，班團友成日笑我係『影后』，對部攝影機太敏感！」
獲頒證書
雖然行程辛苦，但陳煒終可圓其多年心願，她說：「我睇台劇《敗犬女王》中楊謹華講過一句，一定要喺三十歲前完成心願，我三十都過埋就更加要快點完成，所以我咪揀咗今次環島單車行，期間到過高雄、淡水、新竹、日月潭……300公里對我嚟講係一個創舉，我仲攞埋證書，要好好保存。」
文：影視組