謝天華 吳鎮宇眼神過招
謝天華最近再與影帝吳鎮宇結片緣，開拍前天華曾想過鎮宇會如何演繹角色，沒料到排戲時令他眼前一亮，鎮宇將角色拿捏準確，二人互動時火花不斷，天華又指新人文詠珊聰明兼有潛質。
憑「Laughing」一角聲名大噪的謝天華，最近於劇集《潛行狙擊》的電影版《Laughing Gor之潛罪犯》再演Laughing，為了給觀眾帶來驚喜，電影版特別加入一些哲理元素，以最顯淺的方法，好讓觀眾看得明白。
認學到嘢
要在電影版重演同一角色，天華坦言有難度：「層次上複雜咗，有別於之前laughing gor系列，對白又唔多，好多時要靠內心戲令觀眾去感受我諗緊咩，咁先係最難！好似同鎮宇單獨兩人傾偈嘅心態，大家要捉來捉去，所以要靠眼神去處理。」
天華與鎮宇已非首次合作，天華說：「開工第一日就諗過鎮宇會點演『教授』個角色呢？當大家聚埋排戲時，鎮宇竟然有另一種演繹方法，令我突然感覺好新鮮，即刻好開心又興奮，感覺唔同晒。」
鎮宇是否演得好到位？天華說：「佢個角色要好小心處理，多啲又會過火，唔夠又會唔夠力，但鎮宇控制得好好，我同佢嘅戲有互動，有晒火花，真係學到嘢！」
讚文詠珊
片中他與文詠珊有微妙感情線，對於這位後輩，天華大讚她聰明、性格爽朗又靚女，演戲又有潛質，不過有讚當然也有彈，天華說：「佢唔習慣唸急同長嘅對白，一講啲螺絲就彈晒出嚟，可能佢以前好少遇到呢啲情況，仲要係情緒激動之下，所以係呢度kick少少。」
攝影：黃叔榮
場地：九龍香格里拉酒店
文：影視組