錢國偉密會三女催谷攣事
錢國偉（Wilson）去年執導的電影《喜愛夜蒲》甚具爭議性，最近他密密選角拍續集，前晚他現身尖沙咀一露天Cafe，與三名少女密密傾，她們分別是Jeana師妹韋彤（即新八模的Betrys）與CoCo（袁聖殷），以及內地歌手「翻版張韶涵」葉熙祺，三女皆青春貌美甚有潛質，只見他們不時細聲講大聲笑，韋彤卻多次扁嘴，未知是否提及激情戲而感尷尬。
同Jeana鬥激
Wilson發現記者後大方承認正在選角，因想起用新人，本月8日有大型活動招募，上集的DaDa、Jeana及連詩雅或只會客串，問到會否一樣以床戲做賣點？他說：「唔係諗呢方面，不過激情戲一定有，想寫實為主，搜集緊真人真事！（有咩爆點？）聽到好多女同志嘅故事。（難搵女仔？）唔難，上集出咗之後好多女仔想拍。」他坦言上集未算激到盡，但又不想變三級片，故心情矛盾。而韋彤直言可與CoCo做同性戀人，接Jeana棒鬥激！
冧男仔有肉
至於葉熙祺已在內地發展一段時間，曾出碟及到日本拍廣告，最近轉戰香港並說：「有睇上集，好激！我未必應付到。（想同邊個咀？）柯震東！其實我鍾意有肉哋嘅男子，尤其係Pat Pat有肉。」
