華仔親證朱麗倩懷胎4月
踏入新一年，繼楊千嬅宣布有喜後，去年11月在官網公布「吾家有喜」的劉德華，昨日終現身親口證實太太朱麗倩懷孕4個多月。揚言要公私分明的劉德華，迴避記者追問期間，數度忍不住笑不攏嘴，難掩興奮之情。
與楊千嬅前後腳證實婚訊的劉德華，一直被指努力造人，去年11月，華仔在官網宣布「吾家有喜」，但卻未有明言與太太朱麗倩造人成功；直至昨日，華仔為新戲《桃姐》宣傳時，面對記者車輪式大講恭喜，即四萬咁口雙手合十以表謝意。
害喜期已過
不過，華仔其後正色謂：「唔想講咁多家事，想將工作同屋企嘢分開。」之後，更出動招牌安撫金句「乖啦，唔好問」以求記者「放生」，可惜遭記者以黎明金句「反擊」：「請容許我哋曳一次」。問到太太懷孕幾個月？華仔說：「喺網上宣布時3個月，依家差唔多4個幾月。」再細問太太有否害喜，華仔即不欲多說謂：「完喇完喇，多謝。」笑言心情OK的華仔，透露收到很多朋友祝福，不過對於龍胎是仔是女、有否上育嬰堂及是否已改名等問題，他則不願多談：「多謝多謝，我哋私下談論。」此時記者再追問華仔有否Book床位及買了BB用品沒有，被逼到埋牆的華仔只好說：「點解你哋咁固執？（戥你開心吖嘛！）我都係，多謝！」他又指未有與千嬅交流「養胎」心得。
葉德嫻封嘴
被問會否停工陪產，華仔表示要先完成手頭上兩部電影的拍攝工作：「未知（幾時完），不過有部喺香港拍，所以都OK。（停工？）得㗎啦，多謝！」雖然華仔未肯透露是龍仔還是龍女，但卻笑言仔女都無所謂：「遲啲私下話畀大家知，一係遲啲喺街度撞到我再問我啦！」當記者笑問會否叫華媽媽幫忙湊B，華仔即抵死謂：「唔知喎，我幫你問吓吖！」而與華仔情同母子的葉德嫻，亦對「孫仔定孫女」一事三緘其口：「家裏的事不能講，開心事都唔講得。」
