基仔私有Lorraine：我知佢要乜
每個成功男人背後都有個女人，樂壇天王古巨基背後就有個「得力助手」Lorraine，兩人由九四年開始攜手打江山，到九八年基仔將她「私有化」，兩人從未有一紙合約綑綁，關係不言而喻，基仔更肯定地說：「我點會唔知佢要乜！」基仔會一連五日與大家分享他鮮為人知的一面。
我好記得第一次同Lorraine見面的畫面，在94年我剛加盟藝能動音開始出唱片，當時無綫是我經理人，由經理人帶我去跟唱片公司宣傳人員見面，去到中環一間快餐廳，經理人交低我之後走了，當時我見到佢耷低頭整嘢，心諗整乜呢？我坐喺度佢又唔理我，我終於問佢：「你整緊咩？」佢就話：「我隻錶壞咗！」我真係好記得呢個畫面，因為佢竟然唔理我！
見佢多過屋企人
跟Lorraine合作至今已經十幾年，想都冇想過。問我緋聞幾時開始傳，我已經唔記得，直到98年我轉唱片公司，佢就轉為我私人助手，佢可以話係陪住我成長，過去我經歷過的高高低低，佢都見證住。不僅是唱片工作，拍電視劇、電影，甚至近年我的設計工作，佢都有幫我手，財政大臣唔足以形容佢，我見佢的確多過見屋企人。
我同佢之間從來沒有合約，亦唔使合約，我承諾過每年都會加人工畀佢囉，既然承諾得，當然唔會炒佢，炒佢又點加呢？對於外界認定我哋，都冇乜所謂啦。
08年在《勁歌金曲頒獎禮》，第一次攞「最受歡迎男歌星」時，我在台上多謝佢，因為當年我答應過佢，當日返到後台唔見佢，原來佢已經上了保母車，因為佢怕被鏡頭影到，事後佢話我知，佢都有喊，至於我哋在車上點樣激動，就下刪幾百字。
特殊技能記電話
得力助手是個好努力的人，佢要做的事不會因為困難而放棄，我亦一樣，好似當年返大陸拍過兩部長劇，真係冇日冇夜，佢亦跟住我哋劇組開工，有時見到佢好攰、好辛苦，我個心都唔係幾過意得去，但我同佢冇乜點計，唔係佢要求要乜嘢，大家合作咁耐，佢需要乜嘢我點會唔知？我當然知佢要乜，反正咁多年默契，工作上開心或不開心，我都會同佢分享。
其實佢除了努力，仲有鮮為人知的一項特殊技能，就是記電話號碼好叻，雖然依家按一下phonebook（電話簿）就得，但我根本唔使按，我一問佢，佢真係背到晒，就算係幾年冇打過的電話，佢一樣記得，相反我真係冇乜記性。
口述：古巨基
筆錄：音樂組
Make up：Hubei Har @Atelier d'Arris Hair：Mark Ip @ Hair Wardrobe：abc