Alice B.戀富二代傾唔掂數
第四代Canon女模Alice B.樣靚身材正，加上又單身，所以身邊男伴如車輪轉。連日來Alice被拍到有不同國籍男士陪食陪煲煙，當中與富二代Josepe打得最火熱，Alice登堂入室返男方家，可惜神女雖有心，但就無膽闖情關。
現時單身的模特兒Alice B.連日來與不同異性約會，本地及外籍均有，當中包括揸Benz的富二代Josepe，Alice還踩上男方家短聚，可見雙方關係不淺。
早前，Alice出席完活動後，便會合一名中國籍、打扮斯文的眼鏡男，二人在尖沙咀乘渡輪過海，期間眼鏡男陪Alice煲煙又撩她傾偈，表現體貼，不過，Alice似乎對眼鏡男興趣不大，二人全程行到離行離列，眼鏡男送完Alice過海後便無下文，Alice獨自返家。
登名車入豪宅
到了另一日，Alice轉口味改與外籍男士約會，二人到食店歎下午茶，期間煙癮發作的Alice與外籍男士走到食肆門外一齊煲煙，但就明顯保持距離，看來外籍男亦非Alice杯茶。食飽後，富二代Josepe現身會合二人，雖然Alice與Josepe未有親密舉動，但最後Alice登上Josepe的Benz，座駕直駛男方位於半山的豪宅，二人單獨談心，明顯Josepe最討Alice歡心。
曾經想過發展
異性緣絕佳的Alice並非日日與異性約會，隔了數日，Alice獨自一人逛街，表現自得其樂，她還在街邊篤魚蛋，身為知名女模的她懶理儀態，大啖大啖邊行邊食，舉止豪邁，無視旁人目光。
記者致電Alice，問她是否與Josepe拍拖，她大讚對方是好男仔，並直言有想過跟他發展，Alice說：「佢係我一個好好嘅朋友。咁講可能好神奇，其實我哋有當面傾過拍唔拍拖呢個問題，但我哋兩個都覺得保持住我哋嘅友誼會好啲。（怕無咗個朋友？）係呀！佢係我最好嘅朋友。如果發展咗做情侶，就要冒住友情被影響嘅風險。」
文：名人組 攝：追蹤組