娥姐心淡 唔續約TVB

娥姐現時與張兆輝拍攝處境劇《結．分@謊情式》，有指之前娥姐因遲到一小時入廠缺席排戲，令張兆輝不滿，找來監製關永忠落廠調停。戲中飾演娥姐母親的甘草演員雪妮，更希望監製改劇本令其死去，不用再跟娥姐合作。

攞台慶支票累事

娥姐昨日與張兆輝、湯盈盈到灣仔拍攝外景，兩人應記者要求大方合照。娥姐解釋之前遲到純屬誤會，她當日食飯時間到電視城餐廳攞台慶贏得的支票，之後便與編審傾劇本問題，後來助理編導致電給她，她已即時入廠。她謂：「落到廠我都唔知乜事，我遲咗半個鐘，一來等咖啡，一來等支票，其實係一個好小誤會，監製落到廠問邊個失蹤，我都同佢講係我，唔好意思。」娥姐慨嘆每天拍廿四場戲沒有人讚揚，但就被一些小誤會弄致滿城風雨。

被傳不和的張兆輝與娥姐大方合照，未見有芥蒂。	現場所見，娥姐與眾演員有講有笑，相處融洽。	娥姐大唔透，與湯盈盈玩時起飛腳。

娥姐又謂：「之前我每朝都會車我老公返工，可能會遲少少。但我同監製講，依家我唔會車佢，我以後一分鐘都唔會遲，會準時入廠。（老公會唔會嬲？）我老公都叫我唔好做，問我係咪做得好得滯惹人妒忌？係咪每套劇有啲成績，就要攞啲咁唔正面嘅嘢嚟講？」她不諱言之後不再續約無綫，回復自由身。問是否心淡？她說：「我攰！咪同老公周圍去吓旅行、玩吓囉！」問會否一改其率直性格？她謂：「唔會，我係一個透明度高嘅人，有乜唔會擺喺心，豈起我個人真囉！有乜都會坦誠相對。」

張兆輝注重守時

張兆輝被問是否與娥姐合作時不愉快？他謂：「大家合作好好。（嬲佢嗰次遲到？）我邊有發脾氣？我哋做演員一向好注重準時開工，希望所有人都一樣咁諗，我試過拍廠景，等咗好耐，唔知等乜，由九月開始拍時我已經提出意見！但呢樣嘢唔應該我管，係監製話事，我只係嚟拍好個劇！」問之後接劇會否考慮上述問題？他坦言：「會，我都係想幫啲導演揸番緊啲時間，等佢哋拍得晒！」

另外，有報道指錢嘉樂在吉隆坡偷嗒索女，事後於機場向湯盈盈認錯。盈盈強調沒有此事，當日二人去機場只是去接母親及外婆。

文：影視組