許穎索迷魂煙險失身
兩大巨胸o靚模許穎（Phoebe）和何佩瑜（Jeana）如此好「雙乳」，平安夜自然成為餓狼獵物，Phoebe就曾試過在派對中給迷煙一吹，搞到慾火焚身，幾乎失身；Jeana更遇過三十處男孔雀開屏，誠邀破處！
聖誕節普天同慶，可惜平安夜派對處處，卻是危險重重，大概連耶穌也未料到生忌前一晚，會有如此多餓狼四出獵女。身為新一代宅男寵兒的Phoebe和Jeana，向來是派對動物，絕對容易成為一眾狼人的頭號獵物。
致電母親救駕
Phoebe及Jeana接受本報專訪時，提起平安夜不愉快經歷都猶有餘悸。Phoebe縱然玩得夠癲，也絕非隨便之人，談起那次險被迷姦的經歷，仍歷歷在目，她說：「我真係好鍾意開P，平安夜梗係去玩啦，不過從來只有我飲醉抽人水，唔會畀人抽到我水。不過上得山多終遇虎，有次開P差啲畀人迷姦。」她續說：「嗰晚有個男人揸住杯嘢經過，我聞到陣味後，當堂有慾火焚身嘅感覺，當時暈暈哋，真係好驚！」
其時Phoebe原來被迷煙一吹，如墮五里霧中，幸好頭腦仍有一絲清醒，立即致電母親救駕，力保不失，她說：「呢件事真係驚咗我好耐，幸而當晚可以保住清白之軀，真係奉勸姊妹開P時要提高警覺，唔好同朋友失散。」所以她今年蒲聖誕P，都會與Cassic及Milla同行，可以互相照應。
Phoebe險被迷姦，其死敵Jeana卻被處男誠邀破處，她表示幾年前的平安夜派對中，在朋友介紹下認識一位年約三十多歲的處男，起初大家指天篤地，舉杯暢談，惟兩杯落肚過後，對方開始「孔雀開屏」，展現生態魅力：「個男人睇落好斯文，咁當時大家咪傾吓偈一齊玩吓，起初成班朋友都玩得好開心，飲多幾杯大家情緒都high high哋，之後佢仲邀請我同佢一齊跳舞，就開始毛手毛腳！」
辣身舞狂博懵
處男愈摸愈過分，繼而向Jeana提出要求，Jeana說：「大家跳辣身舞時，佢都跳到好high，有摸我攬我，之後佢竟然同我講佢係處男，想畀咗佢第一次我，我聽到好愕然同尷尬。」問到當時有何反應？Jeana說︰「嘩！我嗰時18、19歲，佢成三十歲，同我講佢係處男，我都唔信，真係驚死我！當時真係想攞個玻璃樽敲佢個頭，想佢清醒啲。」
Jeana表示拒絕對方後，立即與女友人拔足速逃，逃過失身一劫！
文︰專案組
攝︰吳文聰、黎志輝
場地︰Misto Resataurant（Jeana），Patio88（Phoebe）