為「窮老公」平反：我覺得冇問題
郭羨妮與老公內地武術指導朱少杰相識大半年便結婚，她坦言緣分天注定，更指丈夫給她的第一個感覺是很害羞，反覺他很得意。她說：「其實我唔知自己鍾意咩類型嘅男仔，有錢冇錢、靚仔同唔靚仔都見過晒，不過我覺得佢畀我嘅感覺好實在，好腳踏實地，係有為青年。」
對於之前不少報道指朱少杰很窮，對此郭羨妮為他平反謂：「我覺得冇問題，佢唔係好窮，又唔係好有錢，一個好男人最緊要係認真做事，男人做緊嘢時嘅認真樣係最吸引嘅！」問朱少杰有否介意別人說他窮？她笑謂：「佢唔會理囉！佢係一個好樂觀嘅人，有時我發脾氣，佢第二日好似失憶咁，會氹番我，咁我哋又當冇事發生過。」說時一臉冧樣，婚姻生活明顯甜蜜蜜。