郭羨妮首認佗龍B：嘔得好辛苦
港姐冠軍出身的郭羨妮（Sonija）喜上加喜，最近她證實懷有3個多月身孕，令娛圈又多一單喜事！Sonija坦言結婚後才有生小朋友計劃，更不設防希望有二人的結晶品，不過「開心事」比她預期中來得快，「幸福女人」Sonija首度開腔講及懷孕感覺，更將在本報一連五日大談入行前後點滴，包括愛情觀、是非、移民加拿大時的生活及工作點滴等，不容錯過。
人生嘅嘢就係咁，唔諗嘅就會發生，之前我真係冇諗過咁快生小朋友，直至結婚之後，我先有呢個念頭，好自然就進入咗呢個階段。之前媽咪都經常催我話：「阿女你年紀唔細，如果唔生，人生好似欠缺咗一啲精彩，出年你就38歲，如果仲想生BB就要快啦！」依家嘅我，真係有咗BB，踏入準備做母親嘅階段，感覺好得意。
我冇諗過究意會生幾多個，等BB出世先再算！都未知做媽媽會係點，亦未知自己係咪可以應付得嚟！之前老公講過想我生多個，佢最想生女，佢話生女會黐爸爸，咁我問佢如果係仔呢？佢話仔都鍾意，我自己其實冇乜所謂，生女，我可以幫佢扮靚；生仔，將來可以保護我。
細說身體變化
當我知道自己已經懷孕時，老公不在港，我打電話話佢知，佢勁開心，仲不停喺度話一定係女嚟嘅！我話唔好咁講，如果係仔你咪會好失望囉。初初懷孕時，都有好多唔舒服，之前成日嘔，都嘔得好辛苦，而且又好怕去啲嘈嘅地方，個人會好敏感，如果逗留喺一個嘈吵地方，我係會嚴重到標冷汗！而且，唔知係咪啲賀爾蒙影響，有咗BB之後個人好冇耐性，好在我胃口都幾好，特別鍾意食酸嘢同鹹嘢，雖然老公因為工作長期喺大陸，不過好在有媽咪照顧我，成日煲湯畀我飲，真係覺得自己好幸福。
每個懷孕嘅女性，都好期待照超聲波的一刻，感覺真係好奇妙o架！feel到佢個心喺度跳、有舊嘢喺度郁時，感覺好得意！我諗我生BB出來時，一定會忍唔住感動到喊。我暫時打算都係開刀生BB，我怕我唔夠力，哈哈！之前喺電視見到啲女人生BB，好痛、好辛苦，母愛真係好偉大。
新階段無欲求
老公完成埋手頭上嘅工作就會返香港陪我，跟住我哋會一齊去大陸過新年，我已經叫佢喺我生之前個幾月請定假陪我；生完BB之後，我都會繼續工作，其實去到我依家呢個階段，唔想去爭啲乜，希望做嘢舒舒服服，我都曾經試過三日三夜冇覺瞓嘅日子，依家真係人生另一個階段。不過因為有了BB，我都已經推咗幾個劇，損失咗7位數字。本來之後有套劇係有機會同老公合作，仲要做打女，不過依家拍唔到，惟有推咗佢。雖然損失酬勞，但我都覺得好值得，因為呢件係開心事，感覺都好幸福。
之前有人問過我同老公分隔兩地，怕唔怕會影響感情？我又唔驚喎！一開始我哋就成日分開，見面時會分外開心，我有時間都會返大陸搵佢，返到嚟香港，我又好習慣一個人生活，佢對我亦都好信任，兩個人相處，信任好重要，唔會因為打個電話搵唔到佢就好驚，好似放風箏咁，走咪放，每個人都有自由。
口述：郭羨妮 筆錄：影視組
攝影：劉智源
場地：AN-TICO（The One）
服裝：Acne@I.T
化妝：Jessica Chan
髮型：Sonija Kwok