靚靚轉軚搵銀唔恨生
向來恨生第二胎恨到出口的袁詠儀昨日出席活動時，對於不少圈中人成功追得龍B，竟自稱不會好「恨」，又指生仔要順天意，並表示工作已排至明年，似乎暗示明年有孕機會不大。
昨日袁詠儀（靚靚）、鍾鎮濤（阿B）女友范姜與女兒、名模琦琦、黃佩霞與仔女，以及楊婉儀一家四口出席假銅鑼灣舉行的Gucci Children專門店開幕典禮，品牌並宣布捐出一百萬美元予聯合國兒童基金會。
最近圈中人紛紛傳出成功追得龍B，曾多次揚言要生第二胎的靚靚被追問何時有喜時，她大改口風說：「我已經有一個，所以唔會好恨。生仔係天意，勉強未必一定會得，有就生，冇就搵錢，兩個都係我最大興趣。」靚靚續說工作已經排到明年，暗示生仔機會不大：「好多工作都係一單緊接一單，如果天意畀我，就要篩選吓工作。」記者提議應交由老公張智霖負責賺錢，她負責生仔，靚靚笑言：「老公都有咁講，佢叫我唔好勉強自己去接唔鍾意嘅工作，但又怕我變大懶蟲，其實由我生咗仔開始，已經唔會勉強自己接工作，鍾意先會做。」
范姜慳啲使報答阿B
另外，范姜表示今年會留港過聖誕，並已開始為小朋友選購聖誕禮物，問到最想收到甚麼禮物時，范姜甜笑說生日時阿B已送了價值六千萬台幣的台灣豪宅給她，故不需任何聖誕禮物，問到如何報答對方，她說：「唔好亂使錢，我湊好小朋友同埋煮多啲好餸畀佢食。」
文：名人組