梁思浩捧莊思敏做君如第二

敢怒敢言 大膽推薦

梁﹕當我睇報紙知道你同吳浩康分手，我好傷心，仲傷心過你。因為你係唯一一對可以用「思浩戀」嚟形容囉﹗依家冇得用呢個名去宣傳我，你話我幾傷心。

莊﹕呢個好爆﹗咁我搵番個乜浩乜，或者乜乜浩嘅人拍拖。

梁思浩大讚莊思敏敢言，而且說話可聽性高。	梁思浩亦指自己在工作上相當拚搏。	莊思敏坦言自己是工作狂，一放假就會病。

梁﹕其實我之前見你剪短咗頭髮，我真係唔敢問，我以為你係因為分手而剪髮，我惟有不停咁讚你型同靚。

莊﹕只係因為機緣巧合，我向來想剪短，不過以前公司唔畀，後來我接咗葉念琛嘅戲，今次係我第三次同佢合作，佢想有啲新鮮感，我就提議剪頭髮。

梁﹕我覺得以我識嘅你，好唔襯長頭髮，因為你好男仔，唔識你嘅人，會畀你嗰頭長髮呃咗，你為人男仔頭、好爽朗，乜都講得。

莊﹕其實我同你唔係識咗好耐，但係就好啱傾，好多嘢講。

梁﹕我覺得你最大嘅才華，係講嘢節奏同可聽性好高，知道點去表達，乜都敢講出口。當初有朋友將你介紹畀我，我覺得幾好，就推薦你入電台，你有機會做第二個吳君如，你敢言又直言，唔係好多女仔夠膽咁講嘢。

莊﹕係呀﹗我拚死，講完先算。

梁﹕未識你之前，我覺你係一個大家閨秀，好有教養。

莊﹕畀我呃咗﹖

梁﹕識咗你，你係個敢言嘅大家閨秀。你係我搵嘅電台拍檔之中，唯一一個係無任何做電台經驗嘅人。當我將你介紹畀電台老闆，佢都有少少意外，我就同佢講你可能係未來嘅吳君如，係就發達，因為你平過吳君如，電台有個難嘅地方，就係唔靠樣，係Sell講嘢嘅吸引性，你除咗敢言之外，我覺得你條界線定得好叻，講嘢從來唔會得罪人，呢方面係好難去掌握，對上一個可以做到嘅係吳君如。

莊﹕多謝，多謝﹗不過，聽到你咁講，我會有壓力。

梁﹕我從來無睇錯過人。

畀無綫炒 激發鬥心

莊﹕你係神仙棒﹗我都知你哋想搵人做電台，但我唔係話見工心態，只係想用最真一面，睇吓你哋覺得適唔適合，估唔到傾完偈，已經話OK。傾到價錢都係好舒服。

梁﹕我可以講你係一個幾貴人工嘅DJ。

莊﹕老闆出手唔錯，我好滿足。我知道你做節目之前唔會同人講嘢，我要自己執生。

梁﹕呢行中有兩個人係咁，一個係我，一個係林海峰，我哋做節目前都唔會講嘢，啲人會問我準備咗講咩，我唔會講，因為一講咗出嚟，大家係無咗個即時反應。

莊﹕我仲有一樣嘢想問你，點解你咁少講感情事﹖

梁﹕我唔係唔講，係無得講，我對上一次拍拖已經係8年前嘅事，當年分手原因係我太忙。當年我畀無綫無理炒咗，我就問炒我嗰個人幾錢人工一個月，答案係14萬，我就話將來我就要搵40幾萬一個月畀佢睇。當時我一個人做四份工，返電台、做電視、寫書、做生意，24小時之中，有20個鐘係做嘢。我當時係無時間拍拖。

莊﹕你依家同佢仲有冇聯絡﹖會唔會再一齊﹖

梁﹕有聯絡，但我冇勇氣同佢喺埋一齊，當年我好忙，因為拍拖就要陪對方，有啲事係無得彌補，無得重新再嚟一次。如果依家先拍拖會好啲，因為捱過咗最艱難嘅時刻，今日我唔會好介意份工，但十年前會好介意。因為我無家人，只有工作畀到我安全感同成功感，我一輸就乜都冇。

愛情虛無 事業第一

莊﹕我都係一個工作狂，一放假就會病。如果愛情同事業揀，我會揀事業，因為愛情係無保障，無論你有幾努力，但都唔係我一個人掌握之內。相反我努力工作，就一定會有回報。

梁﹕今日我事業好成功，無人會話我唔識做嘢，只會話我唔識做人。一隻手只可以攞一樣嘢，無人可以攞到全世界。個個人都係一日24小時，但大家所追求嘅嘢唔同。

莊﹕拍拖係需要時間去磨合，要搵一個好了解嘅人先可以發展，或者要搵個同你一樣咁忙嘅人拍拖，因為大家都忙，咁先會珍惜一齊嘅時間，唔會再有心力去鬧交。我鍾意有鬥心嘅人，唔可以好Hea，否則我會好忟。如果對方好強鬥心，對自己事業好拚搏，我覺得無問題。

梁﹕拍拖嘅嘢無需要擔心，總之先做好事業，呢個係個寶貴回憶。最後我好想引用黃霑講過嘅說話同你共勉之，就係每一個人都要睇多啲、知多啲同聽多啲，尤其做主持同廣播呢行。

攝影﹕劉智源

採訪﹕陳嘉敏

場地﹕Indochine（蘭桂坊）