陳君宜闖時裝界無暇生B

以模特兒身份入行的陳君宜，自從認識富商鄭躬明後，淡出模特兒界。Qinnie笑言這些年來大部分時間總是玩樂和享受人生，但去年下嫁鄭躬明後，反而勤奮起來，她笑說：「拍拖到結婚呢幾年都冇點做過嘢，得閒就周圍去玩、去旅行，但如果成日去旅行都會累，所以先同我老公諗呢門生意，唔使咁無聊，好似瞓醒無嘢做咁。」

老公較勤力

曾修讀時裝的Qinnie，首先想到做時裝生意。其實她過去亦曾在中環開過時裝店，然而今次卻看準網上時裝店市場的商機，但她直言當展開計劃後，想不到做網上時裝生意卻是另一門學問，由採購到宣傳都要費不少工夫，幸得老公大力支持。Qinnie負責採購部分，老公則負責管理整間公司，她說：「佢勤力過我好多，佢負責管理間公司，所有事都親力親為，真係唔容易。」

陳君宜與鄭躬明夫妻檔打理網上時裝店，自然事半功倍。

陳君宜獲好友徐子淇給予做生意的意見，令她打下強心針。

返朝九晚六

問到其好友徐子淇有否幫襯，她說：「梗係有啦，佢係我VIP，子淇本身都好鍾意網購，所以子淇依家見到某啲外國牌子靚，都會第一時間通知我，我會專入一些特別的牌子，大家交流吓心得。」雖然現在要返朝九晚六，Qinnie表示反而得到莫大滿足感，問她可有計劃生BB？她說：「之前都有傾過，但應該冇咁快，玩住子淇幾個BB先啦，依家公司啱啱起步，等穩定啲先算。」

文：呂曉風

攝:吳文聰 服裝:ZEUZ